Ўзини Интернетда молиявий фикрларни ўрганиш ва тарқатиш билан шуғулланувчи ташкилот деб танитган 24/7 Wall St ширкати АҚШнинг ҳар бир штатида энг кўп иш берувчи, яъни энг кўп иш ерига соҳиб бўлган ширкатларнинг рўйхатини эълон қилди.

Маълумки, АҚШда 50 та штат бор. Уларнинг 20 тасида энг кўп иш берувчи ширкат - савдо корхонаси, аниқроғи, супермаркетлар тизими Wal-Mart экан. Бу 20 штат ичида ҳам Wal-Mart энг кўп ишчи-хизматчига эга бўлган штат Техас бўлиб, бу штатдаги Wal-Mart супермаркетларида 156 минг (!!) ишчи-хизматчи ишлайди. Эслатиб ўтамиз, бошқа манбалардан маълумки, дунёдаги Wal-Mart супермаркетларининг сони 11,5 мингдан кўп, ишчи-хизматчиларнинг сони эса, 2,2 миллиондан ортиқ.

АҚШга қайтсак, унинг 13 та штатида энг кўп иш ерига эга бўлганлар университетлар экан. Уларнинг ичида биринчи ўринда Нью-Йорк Университети турибди. Унинг 64 та кампусида (университет шаҳарчаси) 89 минг 871 ишчи-хизматчи ишлайди, 460 минг (!!) талаба ўқийди.

11 штатда эса, энг кўп иш берувчилар - тиббий ва ижтимоий ёрдам бериш ташкилотлари экан. Уларнинг энг каттаси ёки катталаридан бири - Пенсильвания штатидаги Питсбург Университетининг Тиббий Маркази. Бу ерда 60 минг (!!) ишчи-хизматчи бор. 2014 йилда бу Марказда 287 минг (!!) одам даволанган ёки ҳар турли тиббий ёрдам олган.

АҚШнинг биттагина штатида энг кўп одамга иш берган ширкат – саноат корхонаси экан. Бу – учоқлар, вертолётлар, ер йўлдошлари ишлаб чиқарадиган ва сотадиган, айни замонда, лизинг хизматлари кўрсатадиган Boeing корпорациясидир. Бу корпорациянинг Вашинтон штатида (пойтахт Вашингтон шаҳри билан адаштирманг) 80 мингдан кўпроқ олдам ишлайдиган иш ерлари бор.

Wal-Mart ва Boeing Нью-Йорк фондлар биржасининг асосий кўрсатгичи бўлган Dow Jones индексини белгилашда ҳисобга олинадиган 30 та ширкатдан 2 таси. Эслатиб ўтамиз, Dow Jones индекси АҚШдаги энг катта 30 ширкат акцияларининг ўртача нархини ўзида акс эттиради.

АҚШдек давлатда энг кўп ишчи-хизматчига эга бўлган иш жойлари саноат корхоналари эмас, савдо-сотиқ марказлари, ўқув юртлари ва тиббий тизимлар экани аввалига бизни ҳам ҳайрон қолдирди, дейди мухбиримиз. Аммо, ўйлаб кўрилса, буни тушуниш мумкин. Саноат корхоналари ўта тезликда автоматлаштирилмоқда, роботлаштирилмоқда. У ерларда кўп ишчига ҳожат ҳам йўқ.

Boeing корпорацияси АҚШнинг биттагина штатида энг кўп иш берувчи саноат корхонаси бўлгани ноодий ҳолга ўхшайди. Келажакда у ҳам бўлмаса керак.