05 March 2016
12:48 - Ислом Каримнинг иши чатоқ, Ўзбекистон пенсионерлар уюшмаси расман рўйхатга олинди
Мавжуд режимнинг қўғирчоқ ахборот воситалари ўзлари ҳам тушунмасдан, хавфли бир хабарни тарқатдилар.

Маълум бўлишича, шу кунларда Адлия вазирлиги “Ўзбекистон пенсионерлар уюшмаси” номли янги тузилган ташкилотни рўйхатга олибди. Нима учун бу ташкилотнинг номида “нафақахўрлар” ўрнига “пенсионерлар” сўзи ишлатилганинги тушуниш мумкин. “Нафақахўр” сўзидаги “-хўр” қўшимчаси анчагина хунук жаранглайди. Аммо, Ислом Каримнинг иши чатоқлигининг бунга алоқаси йўқ. Гап – бундай ташкилотнинг тузилишини ўзи Ислом Карим учун катта хавф эканлигидадир.

Маълумки, Ўзбекистоннинг иқтисодий аҳволи шунчалик ғарибки, бизда ўртача ойлик, жаҳоннинг ривожланган малакатларини қўйиб туринг, қўшнимиз Қозоғистондан ҳам 8 баравар кам. Ўзбек профессорлари қозоқ дворниклариларидан кам маош олишади.

Тўғри, бошига тўнтарилган декча қозонга ўхшаш дўппи кийиб олган расмдаги каби отахонларимиз ўзларининг аҳволларини ўйлашга ҳам қодир эмаслар. Аммо, уюшма тузилган экан, пенсионерлар ичида бир-иккита дўпписиз, аммо ақли бор мард чиқади ва Ислом Карим режимидан пенсионерлар ҳақида ўйлашни талаб қилиш масаласини ўртага кўндаланг қилиб қўяди. Чунки, хабарларда айтилишича, Ўзбекистон пенсионерлар уюшмасининг асосий мақсади Ўзбекистон пенсионерларининг иқтисодий, ижтимоий, мулкий, маънавий ва бошқа ҳуқуқ ҳамда манфаатларини ҳимоя қилишдан иборат экан.

Ўшанда бу отахонларимиз дўппиларини дарҳол олиб улоқтирмаслар ҳам, ўзларини шу ҳолга солган Ислом Каримни улоқтириш лозимлигини ўйлашга бошлашади. Калла ишлашга бошласа, одам ахир бир кун ҳаракат қилишга бошлайди. Ўшанда на “Ҳаракат”, на “Бирлик”нинг кераги бўлмай қолади. Ислом Карим ва унинг режимини пенсионерларнинг ўзи битиради.

Бўшашманг, нафақахўр отахон ва онахонлар!