Бу мамлакатда Марказий Банк ролини ўйнайдиган Федерал Резерв ўтган йилнинг декабрь ойи ўрталарида 9 йил ичида биринчи марта қарзга берадиган пулдан оладиган фойданинг фоизини, яъни расмий тилда "асосий фоиз ставкаси"ни номигагина, аниқроғи, 0,25 фоизга оширгани ҳақидаги хабарни таҳлил қилар экан, "Федерал Резерв АҚШ иқтисодиётидаги ўсишнинг барқарорлигига ишонмаётганга ўхшайди" деб ёзган эдик. Кейинги воқеалар “Ҳаракат”нинг фикри мутлақо тўғри эканлигини кўрсатди, Нью-Йорк фондлар биржасининг асосий кўрсатгичи бўлган Dow Jones зиг-загли тушиб бормоқда. Аҳвол шундай жиддийки, дунёда глобал рецессия хавфи тахминалари ҳақида жиддий мақолалар чиқишга бошлади.

Кеча пешин соатларида Федерал Резерв асосий фоиз ставкасини ҳозирча бошқа оширмалик ҳақида қарор қабул қилди. Маълумки, асосий фоиз ставкасининг баландлиги мамлакат иқтисодиёти яхши эканлигининг кўрсатгичидир, демак, унинг пастлиги иқтисодда аҳвол эхши эмаслигини кўрсатади. Чунки, иқтисодиётда ишлар яхши бўлса, одамлар ёки ширкатлар катта фоиз тўланишига қарамасдан қарзга пул олиб, ёки янги бизнесс бошлайдилар, ёки бор бизнессларини ривожлантириш билан шуғулланадилар.

Кеча Федерал Резервнинг қарори эълон қилиниши билан сўнги икки кунда бироз бўлса ҳам ортиб бораётган ва кеча пешин соатларида 16235 га чиққан Dow Jones индекси ўпирилиб тушишга бошлади. Кечқурун биржа бекилганда Dow Jones индекси 15944 бўлганди. Яъни, Федерал Резервнинг асосий фоиз ставкасини оширмаслик қароридан кейинги бир неча соат ичида Dow Jones индекси 291 поғанага тушиб кетди.

Ваҳолангки, АҚШда ишсизлик даражаси камайиб бормоқда, янги иш жойларининг сони ортмоқда, дунё бозорларида нефтнинг нархи тушиб бормоқда, АҚШ эса нефть сотишдан фойда оладиган эмас, аксинча, четдан кўп нефть сотиб оладиган давлат. Шундай экан, Нью-Йорк фондлар биржасининг тушиши – АҚШ иқтисодидаги муаммолар натижаси деб бўлмайди.

“Ҳаракат”нинг фикрича, Нью-Йорк фондлар биржасидаги барқарорсизлик - мавжуд ҳукумат, очиқроқ айтсак, Президент Обаманинг ўта заиф ички ва ташқи сиёсат олиб бориши туфайли уларга нисбатан шаклланаётган ишончсизлик белгисидир. Бундай таҳлил – дунёда биринчи бўлиб қилинмоқда. Кўрамиз, “Ҳаракат” яна ҳақ бўлиб чиқади.