“Озодлик” радиосининг тожикча эшиттиришларига асосланиб, Тожикистондаги Asia-Plus агантлиги тарафидан тарқатилган хабарга кўра, бу мамлакатдаги турк лицейлари оғир аҳволда, чунки, Тожикистон Таълим вазирлиги бу лицейларни бошқараётган туркларнинг “Шалола” ширкати билан тузилган шартоманининг ўтган йили охирида тамом бўлган муддатини узайтирмабди. Кўринишидан, узайтирмоқчи ҳам эмас.

Тожикистонда 5 та турк лицей-интернети бор бўлиб, уларнинг биринчиси 1992-1993 ўқув йилида иш бошлаган экан. Ўтган вақт ичида бу лицейларнинг ўқувчилари турли халқаро олимпиадаларда 484 медаль олишган, улардан 88 таси олтин, 130 таси кумуш ва 266 таси бронза. Яъни, лицейларнинг сифати юксак.

Asia-Plus агантлиги яна бир нарсани эслатади. “Шалола” ширкати фатхулла-гуланчиларнинг “Хизмат” ҳаракатига тегишли бўлиб, ҳозир АҚШда яшайдиган Фатхулла Гулен устидан Туркияда жиноий иш қўзғотилган.

Маълумки, дейди мухбиримиз, ҳозир Туркия Президенти бўлган Ражаб Эрдўғон тарaфидан тузилган ва ҳозир ҳокимиятда бўлган Адолат ва Тараққиёт Партияси билан “Хизмат” ҳаракати Туркияни исломий давлатга айлантириш учун биргаликда кураш олиб борардилар. АТПнинг ҳокимиятга келишида фатхулла-гуленчиларнинг ҳам катта ҳиссаси бўлган. Эрдўғон ҳам қарз бўлиб қолмасдан, фатхулла-гуленчиларга ҳокимият структураларида жуда кўп лавозимлар берганди.

Аммо, кейин, кутилганидек, АТПчилар билан “Хизмат”чилар ўртасида ҳокимият учун ички уруш бошланди. Эрдўғон фатхулла-гуленчиларни давлат ичида давлат яратишда айблаб, уларга қарши кўплаб жиноий ишлар очтирди. Фатхулла Гулен устидан ҳам очилган. Ички урушда ҳозирча АТПнинг қўли баланд келмоқда. Бу партия ҳокимиятда эканми, демак, Тожикистон ҳукумати шу партиянинг айтганини қилади. Тожикистондаги турк лицейлари жорийдаги ўқиш йили битиши билан бекитилса керак.