25 November 2014
11:42 - АҚШда қоратанли йигитни отиб ўлдирган оқтанли полисмен оқланди, норозилик акцияси тартибсизликларга айланиб кетди
Шу йил 9 август куни бир дўконда ўғрилик қилгани иддао этилаётган ва полицияга қаршилик кўрсатган қора танли йигит Майкл Бровн Миссури штатининг маркази бўлган Сан-Луис шаҳри яқинидаги Фергюсон шаҳарчасида оқ танли полисмен Даррен Уилсон тарафидан отиб ўлдирилган эди. Ўша воқеадан кейин анча вақт АҚШнинг бир қатор шаҳарларида асосан қора танлилардан иборат бўлган гуруҳларнинг норозилик намойишлари бўлди. Баъзи жойларда, хусусан, Сант-Луисда намойишлар тартибсизликларга ҳам айланиб кетди.

Бу воқеа бўйича Президент Барак Обама ҳам халққа мурожаат қилиб, тегишли тергов ишлари олиб борилаётганини урғулади, уларнинг натижаларини ва сўнгра суд қарорини кутишга чақирди. Вазият сокинлашди.

Ниҳоят кеча суд жюриси Даррен Уилсонни айбсиз деб топди ва унга қарши айбнома қўймаслик ҳукмини чиқарди.

Асосан қоратанлилардан иборат бўлган гуруҳ яна норозилик намойишлари бошлади, тезда бу намойишлар оммавий тартибсизликларга айланиб кетди. Намойишчилар атрофдаги автомобилларни ёқишга, дўконларнинг ойналарини синдириб, уларни талашга бошладилар. Полиция аввалига ҳеч нарсага аралашмасдан тамошабин бўлиб турди, кейин кўз ёшартирувчи газ сепиб намойишчиларни тарқатиб юборди. Аммо, тартибсизликлар тўхтагани йўқ. Ҳозир у ерда ярим кеча, тартибсизликлар ҳали ҳам давом этмоқда.

Ўша воқеалар бўйича берган хабаримизда АҚШ ҳуқуқий давлат экани ва адолат ғалаба қозонишига ишонч билдирган эдик. Ҳатто қора танлилар ўз яқинларининг тақдирига бефарқ қолмаганлари, инсон эканликларини кўрсатганларини олқишлаган эдик. Ҳали ҳам ўша фикрдамиз. Аммо, мамлакат президентининг ҳам эътиборини ўзига тортган воқеа бўйича қонун доирасида терговлар олиб борилгани ва адолатли ҳукм чиқарилганига шубҳамиз йўқ.

Ҳозир жаҳл устида норозилик акциялари уюштираётганлар ҳам тезда шу фикрга келадилар деб ўйлаймиз.
« Олдинги хабар Хабарлар рўйхати Кейинги хабар »