02 September 2014
10:28 - Ўзбекистонда тожикча масхарабозлик: Хорижга чиқиб кетган фуқароларни қайтариш кампанияси авжида эмиш
Кеча асосан рус тилида иш олиб борадиган ўзбекистонлик тожикларнинг 12news.uz сайтида Тошпўлат Раҳматуллаевнинг “Хорижга чиқиб кетган фуқароларни қайтариш кампанияси – авжида” номли мақоласи эълон қилинибди. У ерда айтилишича, Самарқанднинг барча маҳаллаларида чет давлатларга ишлаш учун чиқиб кетган фуқароларни қайтариб келиш ва иш билан таъминлаш масалаларига бағишланган йиғилишлар ўтказилмоқда.

Боғимайдон маҳалласида бўлган йиғилишда шаҳар ҳокими ўринбосари, хотин-қизлар қўмитаси раиси Марҳабо Ғафурова (расмда) “аксарият юртдошларимиз катта иморат қуриш ёки дабдабали тўй қилиш илинжида хорижга кетаётганлигини” ҳам урғулаб, “8 Март”, “Бофанда”, “Восток-продукт” каби қатор корхоналарда 2 мингдан кўпроқ бўш иш ўринлари мавжудлигини айтибди. Мақолада айтилишича, масалан, “Восток-продукт” корхонасида ойлик маошнинг миқдори 450 минг сўмдан бошланар экан.

Хуллас, бундай йиғилишлардан мақсад – чет элда ишлаётганларни аниқлаб, уларни уйларига қайтариш ва бандлигини таъминлаш ишига маҳаллаларни тортиш. Бундан буён маҳалла оқсоқоллари қанча одам чет элга кетгани ҳақида аниқ маълумот тўплаш билан бир қаторда, улардан қанчасини қайси ойда қайтариб келиш ҳақида мажбурият олишлари керак экан.

Мақоланинг русча вариантига кўра эса, чет элда ишлаётганлар аниқлаб бўлинган. Аҳолиси ярим миллион бўлган Самарқанддан юрт ташқарисига иш қидириб 63002 киши кетган, эркаклар 38846, аёллар 24156 нафар. Бунчалик аниқ рақамлар қаердан олингани айтилмайди.

Тошпўлат Раҳматуллаевнинг бу мақоласи замонавий хабарчилик нуқтаи назаридан саводсизларча ёзилганига биздан бошқа ҳеч ким эътибор бермаслиги ўз-ўзидан маълум, дейди “Ҳаракат” мухбири. Мақола муаллифида озгина хабарчилик тушунчаси бўлса эди, “Ҳаракат” Агентлиги тарафидан бу мавзуга оид тўпланган аниқ маълумотлардан фойдаланган бўларди. Маълумотлар эса қуйидагича.

Мамлакат иқтисодининг асосий кўрсатгича бўлмиш Киши бошига Ялпи Ички Маҳсулот ҳажми бўйича, Россия ва Қозоғистондан 8-10 баравар орқадамиз. Аҳолининг ўртача ойлиги ҳам бизда Россия ва Қозоғистонда 8-10 баравар кам. Шундай экан, СССР пайтида каби чегаралар “темир деаор” билан ўралмас экан, миллионлаб ўзбеклар чет элларга ишлаш учун кетаверадилар. Бунинг устига бизда ишсизлик даражаси жуда юқори. Уни тезда тушириб бўлмайди. Демак, ҳозирги босқичда чет элда ишлаётганларни қайтариш билан эмас, у ерга кетиш истагидагиларга ва кетиб бўлганларга ёрдам бериш билан шуғулланиш лозим.

Аввалги хабарларимидан маълумки, “Бирлик” Партияси айнан шундай қилиш лозимлигини узоқ йиллардан бери гапириб келмоқда. “Бирлик” лидери Абдураҳим Пўлат бу мавзуни 1995 йили Швецияда рус тилида чиқадиган “Марказий Осиё ва Кавказ” журналида эълон қилинган мақоласида биринчи марта тилга олган эди. У 2008 йили Ислом Каримга мактуб ёзиб, меҳнат муҳожирлари муаммоалри билан шуғулланадиган вазирлик тузиш, биринчи вазир қилиб ўз ўринбосари Пўлат Охунни тайинлаш таклифини ҳам киритган.

Ўзбекистон режимининг раҳбарлари ҳам, 12news.uz сайтининг саводсиз журналистлар ҳам, минг афсуски, мамлакатимизнинг бундай фундаментал муаммоларини тушунишмайди, масхарабозлик билан ҳаёт кечиришади.
« Олдинги хабар Хабарлар рўйхати Кейинги хабар »