17 January 2023
18:38 - Юсуф Жума: ҚАНДОҚ БАХТЛИ ТУРОНЮРТГА КЕТАЁТГАН ДАҲОЛАР?!… УЛУҒ БОБОЛАРИМ БОЛА ЁШИДА ОЧУННИ БОШҚАРГАН - ОЧУН БОШИДА…

Тағин улуғ Абдулла Қодирий ҳазратларининг
шонли арвоҳларига Улуғ Тангрининг олқишларини
тилаб, бағишлов…


Оташ бўлиб, оташ ичра кутаётир оташи,
Қандоқ бахтли Марғилонга кетаётган Отабек?!
Ёна - ёна ёнғин ичра куйиб қолди Кумуши,
Қандоқ бахтсиз Марғилондан қайтаётган Отабек?!

Мен ҳам ҳар кеч тушларимда Қоракўлга кетаман,
Қандоқ бахтли Қоракўлга кетаётган Юсуфбек?!
Ўнггимдачи қонлар ютиб Қоракўлдан қайтаман,
Қандоқ бахтсиз Қоракўлдан қайтаётган Юсуфбек?!

Кўп куттирдинг, Тангрим, бошла, Туронимга қайтайлик,
Сенинг билан йўл бошласин Ўзингдаги боболар!
Она юртга мангу бўлиб, қайтмас бўлиб, кетайлик,
Қандоқ бахтли Туронюртга кетаётган даҳолар?!!!…

2023 йил, 9 январь.


Ўн йилимни бир йил санаб,
Ёшимни айтсам ҳам уят.
Уят бизга аҳли миллат,
Уят бизга элу элат.

Бола ёшда хоқон бўлган,
Хоқонлар биздан бўлади!
Бола ёшда очун олган
Хоқонлар биздан бўлади.


Мен биздан эмасман - эсиз,
Эсиз - биздан эмасмиз биз.


Кўмилдику боболарнинг
Ор йўллари - ўч йўллари.
БируБордан кўч йўллари,
БируБордан бурч йўллари.

Биз энди биздан эмасмиз,
Энди биз қуллардан бўлдик.
Биз энди Тангридан эмас,
Биз аҳли дунёдан - ўлдик…

Бизга кимлар кирар - кимлар?!
Тангрию Тангризодалар -
Бола ёшда ёвни чопиб,
Дунёни олган болалар.

Тангрига эшлар - соялар -
Тангридан тушган соялар -
Тангрида жўшган болалар -
Тангри - тоғдаги қоялар!!!

Мен биздан эмасман - эсиз,
Эсиз - биздан эмасмиз - биз…

2023 йил,10 январь.



Сочларинг тундан тўғилган,
Юзларинг кундан тўғилган.

Қошларинг ойдан тўғилган,
Кипригинг ёйдан тўғилган.

Кўзларингни чўлпон туққан,
Исларингни бўстон туққан.

Йўқлик ҳам туққан эгизак:
Йўқ бел, йўқ оғиз, ё фалак!!!

Бир жойинг болдан тўғилган,
Бир жойинг олдан тўғилган.

Жон дудоғингни жон туққан,
Бош - оёғингни жон туққан.

Кимни туққан мунча она?!!!
Менда бесаноқ қайнона!!!

2023 йил, 14 январь.


Тотолмадим толе деган чин ёғдудан,
Тонглар қочар қароқдаги қоронғудан.
Кўзим юмиқлигидан кўз юмолмайман,
Уйқусизман уйғонолмайин уйқудан…

2023 йил, 14январь.

Барча душман бўлди, бир дўст бўлмади,
Барча бало келди, бир бахт келмади.
Кўкдаги ёр каби ердаги ёр ҳам -
Кўп ваъдалар қилди, бир нақд қилмади...

2022 йил, 15 ноябрь.


Улуғ боболарим бола ёшида
Очунни бошқарган - очун бошида.
Олтмишдан ошдиму бобо ёшимда
Ўзимни эплолмай, кўзларим ёшда…

2023 йил, 14 январь.