14 December 2022
11:16 - Юсуф Жума: СЎЗИМ - ҲАҚ ЙЎРИҒИ - БЎЛИШИ ШАРТДИР, ТИЛИМГА ТАНГРИДАН КЕЛИШИ ШАРТДИР…
ЭРК, ҲАҚИҚАТ БЎЛАРМИ ТЕКИН?!…

Бир тўйимлик емиш деб барча
Жон тикади кундузу кеча.
Лек Тангри деб - эрк - ҳақиқат деб
Қутлуғ жангга кирмаслар нега?!

Нечун эрк деб тўкмас томчи тер?!
Нечун ҳақ деб кўкрак кермас бир?!
Эл тўярми ишласа бир жон,
Эрк бўларми жон тикса бир эр?!

Барча учун озодлик тилак,
Барча учун адолат истак.
Ҳамма ош деб ишлаганидек,
Ҳамма жангга кириши керак!

Емиш ердан унгувчи экин,
На текиндир ва на у тўкин.
Кўкда унар - Тангридан олқиш -
Эрк, ҳақиқат бўларми текин?!

2022 йил, 8 декабрь.

Диёнатда ўрни йўқни яхши дема,
Ор - номусда ўрни йўқни эр санама.
Жасоратда ўрни йўқни киши дема,
Ор - номусда ўрни йўқни эр санама.

Санамагин эрларни - уй, айвонида,
Элу - юртнинг омон - омон замонида,
Сана - кураш чоғи - мардлар майдонида,
Ор - номусда ўрни йўқни эр санама.

Жон тикарлар - номус жондан устда бўлар,
Эрк,она юрт - ер - туз жондан устда бўлар,
Тангри - Азиз, Азиз жондан устда бўлар,
Ор - номусда ўрни йўқни эр санама.

Жондан пастда пасткашлик бор, манфаат бор,
Жондан пастда номардлик бор, хиёнат бор,
Жондан пастда орсизлик бор, бор иллат бор,
Ор - номусда ўрни йўқни эр санама.

Эрнинг ўрни - жон устида, мардона бўл!
Ўч - ойини жон устида, мардона бўл!
Тангри - дини жон устида, мардона бўл!!!
Ор - номусда ўрни йўқни эр санама.

Ерфурушни тождор этган эл - ерфуруш,
Ёрфурушни тождор этган эл - ёрфуруш,
Орфурушни тождор этган эл - орфуруш,
Ор - номусда ўрни йўқни эр санама.

Юсуф эрдир - қутлуқ тўрда ўрни кенгдир!
Юсуф эрдир - номус - орда ўрни кенгдир!
Юсуф эрдир - БируБорда ўрни кенгдир!
Ор - номусда ўрни йўқни эр санама.

2022 йил, 12 декабрь.

Бир кетнинг кетини кўтарар барча,
Кетфурушнинг кети оғирми шунча?!
Дунё ҳам кўтарар - чунки у тахтда,
Тангрини кўтармас одамзот мунча?!

2022 йил,15 ноябрь.

Йўқдир ўзимчалик осий гуноҳкор,
Нечун яхши кўрар мени БируБор,
Нечун олқишлайди жўшлари билан?!
Чунки йўқ менчалик айбига иқрор.

2022 йил,15 ноябрь.

Кулдан кулнинг фарқи бор, менинг кулим ҳам ёнар,
Гилдан гилнинг фарқи бор, менинг гилим ҳам ёнар.

Сувдан сувнинг фарқи бор, менинг сувим ҳам ёнар,
Селдан селнинг фарқи бор, менинг селим ҳам ёнар.

Соғинчида оҳим ел, ҳажрида ёниб елар,
Елдан елнинг фарқи бор, менинг елим ҳам ёнар.

Бошдан - оёғим олов, изим тушса кўк ёнар,
Йўлдан йўлнинг фарқи бор, менинг йўлим ҳам ёнар.

Булбулиман, қовушсак, кеча - кундуз севишсак,
Гулдан гулнинг фарқи бор, менинг гулим ҳам ёнар.

Эл бўлмас - эл, Тангрим - эл, севгим бўлиб жўш урар,
Элдан элнинг фарқи бор, менинг элим ҳам ёнар.

2022 йил, 9 декабрь.

Сўзим - ҳақ йўриғи бўлиши шартдир,
Ёруғи, ёрлиғи бўлиши шартдир.
Тилимга ўзимдан келмаслиги шарт,
Тилимга Тангридан келиши шартдир!

2022 йил,11 декабрь.
« Олдинги хабар Хабарлар рўйхати Кейинги хабар »