Югославия парчаланиб кетгандан кейин, 1991 йилда мустақиллигини эълон қилган давлатлардан бири Македония Республикаси эди. Аммо, ўшандан бери Юнонистон (Греция) билан бу янги давлат жанжал ичида қолдилар. Гап шундаки, Юнонистоннинг таркибдаги 13 та маъмурий ҳудудлардан биттасининг номи Македония эди. Юнонлар иккита Македония борлиги тушунмовчиликларга сабаб бўлаётганини важ қилиб, Македония Республикасидан ўз номини ўзгартиришни талаб қилишарди. НАТО ҳам шу сабабли Македонияни аъзо қилиб олишга шошилмаётган эди.

2018 йил 17 июнда Юнонистон ва Македония Республикасининг ташқи ишлар вазирлари Никола Димитров ва Никос Котзиас Македония Республикасининг номини Шимолий Македония Республикаси деб аташ тўғрисида келишув ҳужжатини имзолаганларини биз ҳам хабар қилган эдик

Мана орадан ярим йил вақт ўтди, кўп воқеалар юз берди. 2019 йил 11 январда Македония Республикаси парламенти давлат номини Шимолий Македония Республикаси деб ўзгартирди. 6 февралда НАТОга аъзо бўлган давлатларнинг ташқи ишлар вазирлари Шимолий Македония Республикасини “НАТОнинг таклиф қилинган аъзоси” деб тан олувчи протоколни имзоладилар.

Кеча Македония Республикасинининг номини Шимолий Македония Республикаси деб ўзгартирувчи қонун кучга кирди. Демак, Шимолий Македония Республикасини “НАТОнинг таклиф қилинган аъзоси” деб тан олувчи протокол НАТО давлатлари тарафидан ратификация қилингач, яъни тасдиқлангач, Шимолий Македония Республикаси НАТОнинг 30-чи аъзоси бўлиб қолади.