26 August 2016
22:13 - Истанбул бўғозида учинчи кўприк - Ёвуз Султон Салим кўпригининг расмий очилиши бўлди
Бугун Туркия Президенти Ражаб Эрдўғон, унинг хотини ва бир қатор майда-чуйда давлатларнинг раҳбарлари иштирокида дунё “Босфор бўғози” деб атайдиган, аммо турклар қисқа қилиб “Бўғоз” деб айтадиган сув устида 3 йил ичида қуриб битирилган янги кўприк тантанали равишда очилди.

Маълумки, узунлиги 30 км атрофида бўлган бу бўғоз Қора денгиз билан Марамара денгизини бир-бирига улайди ва стратегик аҳамиятга эга. 1973 йилда қуриб битирлган биринчи кўприк Мармара денгизига яқин жойда эди, унинг номи - Бўғоз кўприги. 1988 йили битказилган иккинчи кўприкнинг номи – Султон Фотих кўприги. У Қора ва Марамара денгизларини ўртароғида жойлашган. Бугун очилиши бўлган учинчи кўприк Қора денгизга яқин, унга Ёвуз Султон Салим номи берилди.

Очилиш маросимида нутқ сўзлаган Ражаб Эрдўғон, кутилганидек, кўприкдан ҳам кўпроқ, Туркияда бўлаётган воқеалар, яъни 15-16 июлдаги давлат тўнтариши қилишга уриниш, ПККчилар ва ИШИДчиларнинг террористик ҳужумлари ортиб бораётгани ҳақида гапирди, табиий, оптимистик руҳда ҳозирги ҳокимият кучайиб бориши шубҳасиз эканлигини урғулади.

Автомобиллар бу кўприкдан белгиланган миқдорда пул тўлаб ўтадилар, аммо 31 августгача ўтиш текин бўлади.
« Олдинги хабар Хабарлар рўйхати Кейинги хабар »