Журналист Солижон Абдураҳмонов 10 йилга озодликдан маҳрум этилди

Шу йил 7 июнда Нукусда қамоққа олинган журналист ва ҳуқуқ ҳимоячиси Солижон Абдураҳмонов устидан ўтказилган иш тамом бўлди ва у Тахтакўпир туман судининг қарори билан 10 йилга озодликдан маҳрум этилди.

Аввалги хабарларимизда маълум қилингандек, Солижонни қамоққа олиш пайтида миршабларнинг ўзи унинг машинасига 0,5 килограмм миқдорда марихуанна моддаси ташлаб қўйишганди. Ҳозир ҳуқуқ ҳимоячиси наркотик моддаларни бошқаларга сотиш айби билан жазоланмоқда.

Юрт ташқарисидан юритиладиган ва ўзбек демократик мухолифатига, биринчи навбатда, “Бирлик” Партияси ва у билан боғлиқ ҳуқуқ ҳимоячиларга, демак, ҳуқуқ ҳимоячиларининг асосий қисмига, душманлиги билан танилган uznews.net сайти Солижон Абдураҳмоновни ўзининг мухбири деб ҳам атайди.