АҚШ ҳукуматининг ёрдам пакети тасдиқланса ҳам, дунё фонд бозорларининг чўкиши тўхтамаяпти, сайловларни кутиш керак шекилли

Ўтган ҳафта АҚШ Сенати, кейин Вакиллар Палатаси Буш ҳукуматининг молиявий системага ёрдам пакетини тасдиқлаган бўлса ҳам, дунёнинг фонд бозорларида аҳвол яхши томонга ўзгармади.

Сенатнинг қароридан кейин юқорига чиқишга бошлаган Dow Jones индекси, жума куни қарор Вакиллар Палатасидан ўтгач, яна 300 пунктга тушиб, 10400 атрофида қолди. Ҳолбуки, бўҳрон бошланмасдан олдин у 13000 дан юқорида эди.

Бугун Осиё ва Россия биржалари ҳам асосий индексларнинг тушишидан иш бошлади. Яхши вақтларда 1100-1200 атрофида бўладиган Россиянинг асосий индекс РТС бугун 900 га яқинлашиб қолгач, паниканинг олдини олиш мақсадида, ҳукумат куннинг ўртасида фонд бозорини вақтинча бекитиб қўйди.

Нью-Йорк биржаси бугунги ишини ҳали бошлаганича йўқ.

Дунё молиявий системасининг тузалиши машаққатли бўлиши аниқлашиб бормоқда. Чунки, ҳозир дунёнинг энг кучли мамлакати бўлган АҚШда фақатгина молиявий бўҳрон бўлмаяпти. «Бирлик» лидери Абдураҳим Пўлат таъкидаётганидек, бўҳрон иқтисодда, қолаверса, сиёсатда. АҚШ катта ўзгаришларга муҳтож. Айнан шу сабабли, сайловолди кампаниясини “Ҳамма нарсани ўзгартир!” шиори остида олиб бораётган демократларнинг номзоди Барак Обаманинг шанси яна ҳам ортиб бормоқда. Жамоатчилик фикрини ўрганиш бўйича ўтказилаётган сўровномалар ҳам шуни кўрсатмоқда.