“Бирлик” раҳбари Юсуф Жуманинг ўғлига жавоб хати ёзди

Кечаги хабарларимизда ҳозир қамоқда ётган оташин шоир, демократ, Ўзбекистондаги режим билан омонсиз курашаётган Юсуф Жуманинг ўғли Бобирнинг “Бирлик” Партияси раиси Абдураҳим Пўлатга йўллаган электорон хатининг матнини эълон қилгандик. Бугун “Бирлик” раҳбари Бобурга жавоб мактуби жўнатди. Қуйида у билан танишишишингиз мумкин.

Салом Бобур,

Отангиз Юсуф Жуманинг аҳволи, унинг Ўзбекистон зиндонларида қийноққа солиниши, укангиз Машрабнинг қамоқхонадан ғойиб бўлиши ҳаммани, биз бирликчиларни, жумладан, мени қаттиқ ташвишга туширган. Отангиз тузилган кунларидан бери “Бирлик”нинг фаоли бўлган, сўнги йилларнинг тушунмовчиликларига қарамасдан, биз у кишини сафдошимиз деб ҳисоблашни давом эттирмоқдамиз.

Биз ҳеч кимни, бунинг устига ўз сафдошимизни, ҳар қандай шароитда ёлғиз қолдирмаганмиз ва қолдирмаймиз. Юсуф Жумани ҳам. Шу кунларда унинг тақдири кун тартибимизнинг энг юқорисида турибди. Биз Ғарб мамлакатларига қилган мурожаатларимизда, шахсий учрашувларимизда Ўзбекистонда биринчи қилиниши керак бўлган қадам сифатида сиёсий маҳбусларнинг, хусусан Юсуф Жуманинг озод қилиниши кераклигини айтмоқдамиз ва айтишни давом этирамиз.

Айни замонда, шуни ҳам тушунамизки, сиёсий маҳбусларнинг озод қилиниши ҳам сиёсий иш, бу ишни сиёсий усуллар билан қилиш керак. Ва бу ишни сиёсий мухолифат қилади. Шу мутлақо тўғри фикримиздан келиб чиқиб, Ғарб давлатлари, хусусан Европа Иттифоқинининг Ўзбекистон ҳукуматига таъсирини оширишнинг йўли – унга қарши санкциялар киритиш, уни дунёдан изоляция қилиш эмас, аксинча, у билан алоқаларни йўлга қўйиш эканлигини гапирдик. Европа Иттифоқи биз таклиф қилган йўлдан кетди, натижада аввал Саиджаҳон Зайнобиддинов, кейин Мўътабар Тожибоева ва бошқа бир қатор ҳуқуқ ҳимоячилари озод қилинди. Буни биз “Бирлик”нинг ғалабаси деб биламиз.

Мўътабар Тожибоева билан телефонда гаплашганимизда у менга шундай деди: “Сизнинг позициянгиз мен ўйлагандек эканлигини билганимдан кейин, худди елкамдан тоғ тушгандек бўлди. Мен қамоқда экан, Ўзбекистонга қарши санкциялар талаб қилувчиларнинг овози ортиб, номигина бўлса ҳам санкциялар киритилиши сари аҳволимиз ёмонлашаверди, Ғарб Ўзбекистон билан алоқларини тиклашга бошлаши билан одамларни қамоқдан чиқариш бошланди, мана мен ҳам озод бўлдим. Шу кунларда Ғарб дипломатлари билан учрашганимда, айнан шуларни гапирмоқдаман”.

Аммо, Ўзбекистондаги бир қатор мухолифатчи ва ҳуқуқ ҳимоячилари, хусусан, уларнинг турли баҳоналар билан Европа келиб олганлари, аҳволни тузатишни ўйлашаётгани йўқ, уларнинг мақсади – узоқдан туриб дод-вой солиш, кимларнидир сўқиш ва ҳақорат қилиб олишдан бошқа нарса эмас. Уларнинг баҳри шундангина очилса керак. Бунинг устига Васила Иноятнинг улар тўғрисида “қорни тўймаслар” дейишида ҳам жон бор.

Ҳозир ўша “қорни тўймаслар” асосан “Бирлик”нинг оёғига болта уриш нияти билан яшаётганлари ҳам диққатга сазовор. Ваҳоланки, “Бирлик” мавжуд режим билан курашаётган ягона ташкилот бўлиб қолган. Номоз ўқиш олдидан сафлар тузатилгани каби, ҳозир биз ҳам сафларимизни текислашимиз, ўша қорни тўймаслардан мухолифатни тозалашимиз керак. Номоздан фарқли ўлароқ, биз саф тозалашни кураш давом этаётганда, уни тўхтатмасдан бажаришга мажбурмиз.

Хатимниг охирида шуни айтмоқчиман. Ўзбекистонда демократия учун курашни янада самаралироқ қилиш, отангизни бир дақиқа бўлса ҳам олдинроқ озод қилиш учун бир дақиқа олдинроқ бўлса ҳам ўша қорни тўймасларни овозини ўчиришимиз ёки ўзгартиришимиз керак. Буни ҳам қиламиз. Ҳа, биз бу ишларни бажарамиз, отангизни озод бўлишига ҳам эришамиз.

Онангизга менинг саломларини айтинг, уни асранг. Ҳали яхши кунларда кўришамиз.

Абдураҳим Пўлат
9 август 2008 йил