Украинада янги сиёсий кризис бошланадими?

Зарғалдоқчилар Украинанинг яқинда сайланган парламентида жуда мўрт кўпчиликка эга эканликлари, уларнинг ичида ҳам мустаҳкам бирлик йўқлиги янги кризисларга сабаб бўлиши мумкинлиги аввалдан ҳам маълум эди. Шу сабабли, Олий Рададаги зарғалдоқчилар коалицияси ва Юлия Тимошенконинг ҳукумати эҳтиёткорлик билан ҳаракат қилиши кутиларди.

Лекин, кўринишидан, мўртлик эҳтиётликдан кучлироқ чиқмоқда.

Олий Радага жуда қийинчлик билан зарғалдоқчи Арсений Яценюк раиси қилиб сайлангандан бери бу қонунчилик органи нормал фаолият олиб боролмаяпти. Мухолифат унинг фаолиятини бутунлай тўхтатиб қўйган. Бугун президент Виктор Юшченконинг айтишича, парламент аъзолари Яценюкнинг истеъфосини талаб қилиб имзо тўплашга бошлашган. Уларнинг ичида мухолифатчилардан ташқари зарғалдоқчилар ҳам борлиги келаётган кризиснинг энг муҳим кўрсатгичидир.

Зарғалдоқчиларнинг ичидаги муаммолар бугун биринчи марта Юшченко-Тимошенко ўртасидаги қарама-қаршилик сифатида ўртага чиқда. Кеча Юлия Тимошенко Бош вазир сифатида Давлат мулки фондининг раиси Валентина Семенюкни лавозимидан четлаштирган эди. Бугун Юшченко бу қарорни Конституцияга зид деб ҳисоблаб бекор қилди.

Бунинг устига, мамлакатда Россия томонидан яширинча дастакаланаётган кучлар – Украинанинг НАТОга киришига қарши бўлганлар ва рус тилини асосий тил сифатида сақлаб қолиш тарафдорлари бош кўтармоқдалар. Улар ҳам зарғалдоқчиларга қарши.

Бундай шароитда зарғалдоқчилар тезда бирликларини тикламасалар, Украина янги кризис ва янги сайловлар томон кетади.

Украинадаги воқеалар “Бирлик” Партияси раиси Абдураҳим Пўлатнинг “ҳокимиятга келмасдан аввал мухолифатнинг сафларини мустаҳккамлаб олиш керак, кейин кеч бўлади” қабилидаги сўзлари нақадар тўғри эканлигини кўрсатмоқда.