Президент сайлови вақтида бўлади, “Бирлик” яна ҳақ чиқди

Бу йил президент сайлови конституцияда кўрсатилган вақтда бўладими, бўлмайдими, деган савол мухолифатнинг турли доираларида спеклятив муҳокама қилинди. Фақат “Бирлик” Партияси сайлов вақтида бўлишига ишониб, тайёргарлик ишларини аллақачон бошлаб юборганди.

Эслатиб ўтамиз, Ўзбекистонда сайловлар вақти парламентнинг қарори билан тайинланмайди. Сайловлар вақти Конституцияда узил-кесил белгилаб кўйилган. Унга кўра, масалан, президент сайлови жорийдаги президентнинг ваколати битадиган йил декабрь ойининг учинчи ўнкунлигининг биринчи якшанбасида бўлади. Бу йил бундай кун 23 декабрдир.

Сайловолди кампаниясининнг бошланишини эълон қилиш Марказий Сайлов Комиссиясига (МСК) юклатилган. Президент сайлови ҳақидаги қонунга кўра, сайловолди кампанияси президент ваколатлари тугамасдан камида 3 ой аввал эълон қилиниши шарт. Демак, МСК сайловолди кампанияси бошланганини ўтган йилнинг 22 октябридан аввал эълон қилиши керак эди, қилмади. Аммо, бугун сайловолди кампанияининг бошланишини 21 сентябрда эълон қилажагини билдирди. Демак, бу йилги президент сайлови кўпол қонун бузувчилик билан бошланмоқда. Бу факт янги сайланадиган президентнинг ваколатлари битгунча қадар сайлов натижаларини бекар қилиш талаби билан унга “тинчлик бермасликка” асос яратади. Мухолифат буни эсида тутиши керак.

Аввал хабар берганимиздек, “Бирлик” Партияси президент сайлови ўз вақтида бўлади, деган фикрга асосланиб, сайловларга тайёргарлик анча илгари бошлаб юборган.

Шуни ҳам алоҳида айтиш керакки, сўнги йилларда сиёсий фаолиятдан четда қолган бир гуруҳ собиқ бирликчилар, “Бирлик”нинг сайловолди кампаниясига болта уриш мақсадида “Бирлик” ҳалқ ҳаракатини тиклаш шиори билан иш бошлаганларди. Ваҳоланки, “Бирлик” халқ ҳаракати ўз қурултойида партияга айланишга қарор қилган. Демак, бу гуруҳнинг фаолияти ҳеч қандай қонуний ва маънавий принципларга асосланмаган. Лекин, уларни бошқараётганлар ҳам сайлов вақтида ўтишини аниқ билган одамлар, яъни режим одамлари эканлигига шубҳа йўқ. Акс ҳолда, ҳар қандай ақли бор демократ руҳдаги киши, мухолифатнинг асосий кучи бўлмиш “Бирлик” Партиясига қарши айнан сайлов олдидан бундай ифлос ҳаракат қилиш ташаббуси билан чиқмаган бўларди.