Россияда демократик руҳдаги бир партия бекитилди

Бугун Россия Олий суди Федерал руйхатга олиш хизматининг талаби билан Россия Республикачилар Партиясини (РРП) тугатиш ҳақида қарор қабул қилди. Бу партиянинг раисдошлари, машҳур демократлар Владимир Рижков (у Россия Давлат Думасининг аъзоси, аммо партия рўйхатидан эмас, бир мандатли сайлов окургидан мустақил сифатида сайланган) ва Владимир Лисенко Кремлнинг буйруғи билан олинган бу аслида сиёсий қарорни юқори инстанцияларга, керак бўлса, Европа инсон ҳақлари судига шикоят қилажакларини билдирдилар. Партияни бекитиш учун унинг рўйхатга олиш учун керак бўлган 50 минг аъзосидан фақат 42 мингининг имзоси ҳақиқий эканлиги баҳона қилиб кўрсатилган.

Бу қарор ҳақиқатда ҳам Кремлнинг буйруғи билан қилинганини кўпчилик рус сиёсатшунослари ва мустақил экспертлар айтмоқдалар. Путиннинг мақади сиёсий саҳнада “чўнтак” партияларинигина қолдириш.

Охирги сайловларда РРП ва бошқа демократик партиялар — Яблоко ва СПС — 7 фоизли тўсиқдан ўтолмаган ва Давлат Думасига киролмаган эдилар. Шундай бўлса ҳам, сиам эгизаклари каби бир-бирига ўхшаш бўлган бу демократик партиялар бирлашиш учун келишолмаяптилар. Худди Ўзбекистонда каби. Аммо, Ўзбекистонда вазият бошқачароқ. Бу ерда “Эрк” партиясининг 53-54-чилар деб билинган фаоллари “Бирлик”га нисбатан тўғридан тўғри сотқинлик қилганлар, демак, уларнинг бирлашиши мумкин эмас. Бироқ, санаб ўтилган рус партиялари фақат ва фақат лидерларининг амбициялари туфайли бир орага келмаётганлари ҳаммага маълум.

Шу сабабли, РРПнинг бекитилиши Путин ҳукумати тарафидан қилинган тамомийла антидемократик қадам бўлса ҳам, амалда, демократларнинг бирлашишига ёрдам бериши мумкин. Чунки, рус демократлари сиёсий саҳнада қолишни истасалар бирлашишга маҳкумдек кўринмоқдалар.