Швецияда “Бирлик” фаолларининг йиғилиши

22 декабрда Швециянинг шимолий минтақаларида муҳожиратда яшаётган “Бирлик” Партияси фаолларининг йиғилиши бўлди. Набижон Норбўтаев (партия Марказий Кенгашининг аъзоси), Ҳайитбой Қўзиев (партиянинг Поп туман ташкилоти раиси), Лутфия Йўлдошева (партиянинг хотин-қизлар ташкилоти “Тўмарис”нинг раҳбари), Одилжон Муҳиддинов ва бошқалар (жами 10 киши) қатнашган мажлиснинг кун тартибидан 3 масала бор эди. Биринчиси, “Бирлик”нинг Ўзбекистондаги фаолиятини жонлантириш учун юрт ташқарисидан уюштирилиши мумкин бўлган ёрдам. Иккинчиси, 2007 йилда бўладиган президент сайловларига тайёрланиш. Учинчиси, Европа Иттифоқи – Ўзбекистон муносабатлари ҳақида.

Швецияда яшаётган “Бирлик” фаоллари кун тартибининг биринчи масаласини муҳокама қилгач, Ўзбекистондаги сафдошларига моддий ёрдам уюштириш, уларни замонавий техник воситалар билан жиҳозлаш каби ишлар билан шуғулланишга келишдилар. Улар “Ҳаракат” журналини чиқариш, хусусан, унга материаллар тайёрлашда ҳам иштирок этадиган бўлдилар.

Иккинчи масала бўйича, келаётган президент сайловларида мухолифат умумий нозод билан қатнашган тақдирдагина бирон натижаган эришиш мумкинлигини таъкидлаган йиғилиш қатнашчилари партия Марказий Кенгашининг шу йил 11 ноябрдаги мажлисида қабул қилинган қарорга тўла қўшилишларини билдирдилар.

Эслатиб ўтамиз, Марказий Кенгашнинг қарорида “Бирлик” 2007 йилда бўладиган президент сайловларида умумий номзод билан қатнашиш ғоясини тўла қўллаб-қувватлаши билдирилган ва “Бирлик” номидан умумий номзодга номзод қилиб Абдураҳим Пўлатни кўрсатишга келишилган.

Учинчи масала бўйича, бирликчилар Европа Иттифоқига Ўзбекистондаги воқеалар ҳақида материаллар тайёрлаш, Ўзбекистон ҳукумати ўз ваъдаларини қандай бажарётгани ёки бажармаётганини кўрсатувчи далиллар тўплаш ва уларни ЕИга мунтазам етказиб бериб туришга қарор қилдилар.