«Эрк» партиясининг плакатлари ҳақида

10 майдаги хабарларимиздан бирида, Андижон воқеаларининг бир йиллиги муносабати билан ўтказиладиган пикетлар ҳақида маълумот бераркан, “Эрк” партияси фракцияларидан бирининг раҳбари тарафдорлари, бу пикетларни тайёрлашда мутлақо иштирок этмасликларига қарамасдан, пикетлардан ўз партиялари номини реклама қилишга ҳаракат қилишга уринаётганларини тилга олгандик. Редакциямизга бу хусусда бир нечта ғазаб ичида ёзилган мактуб келди. Уларнинг муаллифлари, кўринишидан ўша фракция тарафдорлари, бу хабар мухолифатни бирлаштириш эмас, парчалаш йўлига ҳизмат қилажагини айтишган.

Оқни қора қилиб кўрсатишни истаётган бу ўқувчиларимизнинг фикрларини ҳурмат қилган ҳолда, уларни масалага совуққонлик билан қараб, бор нарсаларни тўғри кўрабилишга чақирамиз ва қуйидагиларни билдирмоқ истаймиз.

1. Гап хабарда эмас, гап воқеада. Воқеа бор экан, хабарга ёпишиш адолатсизликдир. Ҳеч ким “эрк”чиларнинг плакатларида партияни реклама қилиш нияти борлигини инкор этолмайди, демак, ойнадан ўпкаланиш керак эмас.

2. Умумий мақсад билан тадбир ўтказиб, талабларни бирон бир гуруҳ номидан ўртага қўйиш, тадбир қатнашчиларини бўлишга ҳаракат қилишдир. Агар “Эрк”нинг бу гуруҳи йўлидан кетсак эртага дафн этиш маросимларида ҳам ҳар бир партия вакиллари айри-айри юришга бошлашади, ҳамма ерда ҳар ким “ўзлигини” кўрсатишга ҳаракат қилади. Шунинг учун бундай плакатларни кўтартиришга рухсат бермаган пикет ташкилотчилари жуда тўғри қилишгани, пикетларда ҳамма бир тану бир жон бўлиб чиқишини таъминлаганлари, бу пикетларда, тарафкашлик бўлмасин дея, атайлаб “Бирлик”нинг Андижон воқеалари бўйича Баёноти ўқилмаганини фақат олқишлаш керак.

Вақти келгани шуни ҳам айтиш керакки, 10 майдаги хабар орқали бундай нотўғри ишларни қилмаслик хусусида огоҳлантиришга қарамасдан, Швейия пойтахтида ўтказилган пикетга охирги дақиқада қўшилишга қарор қилган ўша “Эрк” гуруҳиниг икки вакили партиялари номи ёзилган плакатларни кўтаришга ҳаракат қилишди. Аммо, уларга рухсат берилмаганидан кейин, плакатлар тагидаги партия номини кўрсатувчи сўзларни ўша ернинг ўзида йиртиб ташлашга мажбур бўлишди. Агар улар бизнинг 10 майдаги хабаримиздан тўғри сабоқ чиқаришса эди, Киевда қилингани каби у сўзлар маданий шаклда аввалдан олиб ташланган бўларди.

Агар “эрк”чилар мухолифатнинг бирлиги устида қайғураётган бўлишса эди, бундан хурсанд бўлардик. Кўринишидан, минг афсуски, ундай эмас. Плакатлар масаласи жуди кичик бир хусусий масала. Муҳим масалаларга қарайлик.

3. Олдимизда президентлик сайловлари бор. “Бирлик” партиясининг лидери сайловларга умумий якка номзод билан чиқишни таклиф қилди. Унинг таклифи ўтган йили “Ҳаракат” журнали ва сайтида эълон қилинган. Шундай пайтда “Эрк” партиясининг ҳозир гапирилаётган гуруҳи бошқа мухолифат партиялари билан маслахатлашиш, “Бирлик”нинг таклифини ҳисобга олиш нияти йўқлигини очиқча кўрсатиб, ўз номзодини шошма-шошарлик билан, ҳатто мавжуд қонунларни ҳам ўрганмасдан, кулгили равишда ўртага чиқариши мухолифатнинг бирлашиш ғоясига нисбатан провакация эмасми?

Шундай муҳим ва стратегик масалада мухолифатнинг бирлигини бузишга ҳаракат қилаётган бу “эрк”чиларнинг плакат каби ушоқ масалани тўполонга айлантиришга интилишлари ножиддийликдир. Уларга маслахатимиз: Ҳали ҳам кеч эмас, номзод кўрсатишда қонунлар ҳисобга олинмаганинидан келиб чиқиб, қарорингизни бекор қилинг, умумий номзод чиқариш ғоясига қўшилишингизни очиқланг.

Мана шундай қилинса, ҳамма сизнинг принципиаллигингизни, мухолифатни бирлаштириш учун ҳамма нарсага тайёр эканлигингизни кўради.