Мархаматлик бирликчи-хукук химоячиларига карши жиноий иш очилди

28 майда туман Мархамат тумани прокурори Йўлчиевнинг санкцияси билан ушланган «Эзгулик» жамиятининг Мархамат тумани раиси Мухиддинов Дилмурод, «Бирлик» Партиясининг шу тумандаги етакчиси Бобожонов Мусажон ва мустакил хукук химоячиси Отахонов Мухамматкодирнинг озод килинишини талаб килиб, 30 май куни прокуратура олдида йигилган 500 кишининг олдига чиккан туман хокими 3 кишининг эртага озод этилажагини билдирганди. Бугун олинган маълумотга караганда, Асака шахар милициясининг изоляторига ўтказилган мухолифатчилар озод килинмаган, аксинча, уларга карши расман жиноий иш очилган.

Уларга Ўзбекистон Жиноят кодексининг 159-3 моддаси билан (давлат тузумини зўравонлик билан ўзгартиришга уриниш) айб эълон килинган. Бунда айб кўйилишга сабаб – улар томонидан «Бирлик» Партиясининг Андижон вокеалари бўйича баёнотномасини ва партия раиси Абдурахим Пўлатнинг АКШ Конгрессининг Хельсинки комиссиясида Андижондаги конхўрлик хусусида сўзлаган нуткини кўпайтириб таркатиш, хусусан уларнинг нусхаларини расмий давлат идораларига етказиш бўлмокда.

Мухбиримизнинг фикрича, бу иш хеч качон судга бориб етмайди. Хокимиятдагиларнинг максади мухолифатчиларни кўркитишдир. Бутун дунёда демократик ташкилот деб тан олинган «Бирлик» Партиясининг Баёнотини конституцион тузумга тажовуз деб бахолаш, шу пайтгача бу модда билан айбланиб, кўп йилларга озодликдан махрум этилган минглаб кишиларнинг «жинояти» хусусидаги шубхаларни янада орттирган бўларди, халос.

Бу жараённинг яна бир томони бор. Мухолифатдаги хамма ташкилотлар Андижондаги конли вокеаларда хукуматни айблаб баёнотномалар эълон килдилар. Аммо, факат «бирликчи»ларгина ўз баёнотларини халк ичида кўпайтириб таркатдилар. «Бирлик»нинг баёнотидаги куйидаги сатрлар ўз адресига бориб етганига ўхшайди: «Хеч шубха йўкки, халкни ўкка тутганлар ва туттирганлар халк олдида, конун ва тарих олдида жавоб берадилар».