Биздан ҲАРАКАТ, Аллоҳдан БАРАКАТ!
Белорусия мухолифати ичида ҳам тинчлик йўқ
Ўзбекистон, Россия, Озорбойжонда каби Белорусия демократик мухолифати ичида ҳам бирлик йўқ, ички муаммолар туфайли қизғин жанглар бор. Бутун мухолифатни қўйиб туринг, мухолифат партияларининг ичида ҳам шу аҳвол.
Ўтган якшанба куни мухолифатнинг асосий кучларидан бири бўлмиш Белорусия социал-демократик “Громада” партиясининг қурултойи бўлган. Бу қурултой ҳисобот-сайлов қурултойи эмас, яқинда бўладиган парламент сайловларига тайёрланиш, парламентга ўз номзодларини кўрсатиш учун йиғилган эди. Партия раиси Александра Козулин икки йил аввал президент сайловлари арафасида убштирган митинглари туфайли 5,5 йилга қамалгани сабабли қурултойда иштирок этмаган. “Свобода” радиосининг билдиришича, раис вазифасини вақтинча бажариб турган Анатолий Левкович раиснинг қамоқдалигидан фойдаланиб, янги сайловлар ўтказишга ва раис бўлиб олишга эришган. Александр Козулин эса фахрий раис қилинган.
Бундай қарорга қарши овоз берган партия фаоллари раис алмаштириш давлат раҳбари Лукашенко билан келишилган ҳолда ўтказилганини айтиб, янги раисни хоинликда айблашмоқда. Уларга кўра, янги раис парламентга киритилиши ва бу факт Белорусияда демократиянинг олға кетиши сифатида пропаганда қилиниши мумкин.
Воқеалар қандай давом этишини вақт кўрсатади. Янги раис ҳукуматнинг қўғирчоқими ёки йўқми, деган саволга ҳам жавоб кейинроқ берилади. Аммо, бир нарса аниқ. Бир маҳаллар “Бирлик” бўлиниб, куч йўқотганида ҳам воқеалар ҳукумат тарафидан бошқарлаётганига ҳамма ишонмаганди. Ҳозир буни ҳамма билади. Белорусияда ҳам вақти келиб ҳамма нарса очиқланади. Аммо, ҳозирча диктатура мустаҳкамланаётгандек кўринмоқда.
