Кеча, 20 февраль куни Европа Парламентининг Ташқи Алоқалар Комитети - Европа Иттифоқи билан Туркия ўртасида узоқ йиллардан бери олиб борилаётган Туркияни ЕИга аъзо қилиб олиш бўйича музокараларни тўхтатиш тўғрисидаги таклифни маъқуллади. Ташқи Алоқалар Комитетининг 47 аъзоси бу таклифни маъқуллаб овоз берибди, 7 аъзо қарши бўлган. Табиий, энди бу таклиф Европа Парламентининг умумий мажлисида ҳам кўрилиши керак.

Буни гапиришга ҳам ҳожат йўқ, чунки ҳамма биладики, Туркия НАТО аъзоси бўлса ҳам Россиядан С-400 ракеталари сотиб олмоқчи бўлаётгани ва ҳозир Туркияни исломлаштириш жадаллашаётгани Европа давлатларининг жиғига тегмоқда. Шу сабабли Туркия учун ЕИ эшигини ёпишга жиддий ҳаракат бошланди.

Эрдўғанга иккинчи зарба Туркиянинг ичидан келди. Кеча Истанбулда Туркиядаги отатуркчи бизнесменларининг TÜSİAD (Türk Sanayicileri ve İş İnsanları Derneği, ўзбекчаси – Туркия Саноатчилари ва Тадбиркорлар Жамияти) деб танилган ташкилотининг Бош Идораси навбатдаги 49-чи йиғилишини ўтказди (расмда). Мавжуд ҳукумат билан келишувчилик сиёсати олиб борган Бошқарув Идораси раҳбари Эрол Билечик ўрнига, Жамиятнинг фикрларни ҳаммага етказиш билан қатъий шуғулланадиган Симон Касловски (Simone Kaslowski’) сайланди. Унинг 2 ўринбосари ва Бошқарув Идорасининг 8 аъзоси ҳам сайланган.

Бундан ҳам муҳими, кечаги йиғилишда юксак инфляция туфайли ўртага чиқадиган таҳликалар, жумладан, иқтисодиётда бўладиган кризислар, ишсизлик даражасининг ортиши каби факторлар тилга олинди. Ҳеч шубҳа йўқки, TÜSİADнинг янги раҳбарияти шу ва шу каби факторларга таяниб, ҳукуматни тўғри йўлга солишга ҳаракат қилади.

Эслатиб ўтиш керакки, Туркияда TÜSİADдан ташқари, фанатик мусулмон бизнесменларни бирлаштирувчи MÜSIAD (Мустақил Саноатчилар ва Тадбиркорлар Жамияти) ҳам бор.