Бу мамлакат Президенти Доналд Трамп ўзининг Твиттердаги ҳисобида шундай ёзибди: “Мамлакатда (АҚШда) ҳозир камида 25 722 342 нолегал муҳожир бор. Кўп йиллардан бери айтиб келинаётгандек 11 миллион эмас.”

Бу муҳожирларнинг катта қисми Лотин Америка давлатларидан бўлгани сабабли, Доналд Трамп Мексика билан чегарада девор қуриш кераклигини президентликка сайланганидан бери гапириб келмоқда. Аммо, АҚШ Конгрессининг қуйи палатасида, яъни Вакиллар Уйида кўпчилик Демократик Партия депутатлари бўлгани сабабли, улар Президентнинг ҳар қандай ташаббусини йиқитишга кучлари етади. Айнан шу сабабдан ўтган йилнинг кузи бошланишида тасдиқланиши керак бўлган Давлат Бюджети ҳалигача тасдиқланмади ва 2018 йил декабрь ойининг охирги ўн кунлигида Доналд Трампнинг ҳукумати ўз фаолиятини қисман тўхтатишга (шатдаунга) мажбур бўлганди.

Аммо, ўтган жума куни Доналд Трамп бироз орқага чекинди, Конгресс 15 февралгача бўлган қисқа вақт учун Даввлат Бюджетини тасдиқлади ва шатдаун 15 февралгача тўхтатилди. Доналд Трамп ва Оқ Уйнинг ходимлари 15 февралгача Мексика билан чегарада девор қуриш учун сўралаётган кўп миллиард долларлик маблағ масаласида Конгресс билан келишилмаса, АҚШда фавқулодда ҳолат эълон қилиниши ва девор қуриш учун маблағ топишга бошқа йўллар қидирилишини айтмоқдалар.