Reuters Агентгининг Тошкент вақти билан кечаги хабарига кўра, АҚШ Президенти Доналд Трамп Twitter саҳифасида Хитой раҳбари Си Цзинпин билан 29 декабрда телефон орқали гаплашгани, икки давлат ўртасидаги ўзаро савдо масаласидаги келишмовчиликларга барҳам бериш ҳақида келишилгани, бу катта олға кетиш эканлигини эълон қилибди.

Маълумки, бу икки мамлакат 2018 йилнинг февраль ойидан бери савдо уруши ичида бўлиб, ўзаро савдо оқими юзлаб миллиард долларлик зарар кўрган эди. Энди икки тараф савдо урушини 3 ойга тўхтатишга, бу вақт ичида ҳамма муаммоларни ҳал қилишга келишибди. Reuters Агентгининг хабарида айтилишича, Хитой оммавий ахборот воситалари ҳам, Си Цзинпинга асосланиб, савдо уруши битиш арафасига келганини урғуламоқда эканлар.

Агарда АҚШ ва Хитой раҳбарлари келишган бўлсалар, дейди “Ҳаракат”нинг мухбири, янги йил байрамидан кейин Нью-Йорк фондлар биржасида барқарорлик тезда тикланади ва биржанинг асосий кўрсатгичи бўлган Dow Jones индекси 2018 йил 3 октябрдан кейин бошланган 6 минглик ўпирилишни тиклаб олади. Унутмайликки, биржа 25 декабрда нишонланган Рождество/Кристмас байрамидан кейинги уч кунда 6 минглик ўпиришнинг бир мингдан кўпроғини тиклаб бўлган эди. Тахмин қилиш мумкинки, АҚШ ва Хитой раҳбарлари келишув арафасида эканликлари орқаваротдан Нью-Йорк биржасига ҳам етиб келган ва Dow Jones тикланишга бошлаган.

Демак, бу биржадаги жараёнларни яқиндан кузатиб бориш керак.