Шу йил 23 декабрда эълон қилинган “Forbes журнали ҳам масхарабозликка ўтдими, ёки Ўзбекистонда бу йилга $35, 869 млрд қилиб режалаштирилган ЯИМ ростдан ҳам $48 млрд-га чиқдими?” сарлавҳали хабаримизда АҚШдаги машҳур Forbes журнали Бизнес учун Энг Яхши Давлатлар (Best Countries for Business) рўйхатида Ўзбекистонга 105-чи ўрин берганини шубҳа остига олгандик. Шубҳага асос борлигини кўрсатиш учун бу журнал Ўзбекистон аҳолисини 30 миллион деб ва Киши бошига Ялпи Ички Маҳсулот ҳажмини $1500 деб ҳисобга олгани хато эканлигини айтгандик. Чунки, бизда ҳозир аҳолининг сони 32 миллиондан ҳам ошган, 2018 йил учун Киши бошига Ялпи Ички Маҳсулоти ҳажми эса, $1118,75 бўлиши кутилмоқда.

Ҳозир Gazeta.uz сайтининг хабаридан маълум бўлишича Standard & Poor’s халқаро рейтинг агентлиги Ўзбекистонга барқарор прогнозли «BB-» рейтинг даражасини берган ва буни асослаш учун Ялпи Ички Маҳмулот бизда ортиб бораётгани, инфляция тушиб бораётгани каби кўрсатгичларга таяниш билан бир қаторда агентлигининг экспертлари бизда Киши бошига ЯИМ пастлигича қолаётгани ва 2018 йилнинг охирида $1200 бўлишини камчилик сифатида кўрсатганларини ҳам таъкидлаган.

Хуллас, қисқа қилиб айтсак, Standard & Poor’s халқаро рейтинг агентлигининг фикри “Ҳаракат” билан бир турли экан. Нима ҳам дердик, унга “Раҳмат”, ўзимизга “Офарин” деймиз.

Расмдаги харитада жаҳон давлатларининг рейтинги турли ранглар билан кўрсатилган. Тўқ яшил рангли давлатларнинг рейтинги юксак (ААА), сариқларники ўртача, тўқ жигарранглиларники (СС/В) энг паст. Кулранг рангдаги давлатларнинг рейтинги ҳали белгиланмаган. Бу харита эълон қилинган пайтда Ўзбекистон ҳам кулранг бўлган, ҳозир тўқ сариқ бўлиши керак.