24 December 2018
07:14 - АҚШ ҳукуматининг катта қисми молиявий сабабдан ишини бугундан тўхтатишга мажбур бўлади
АҚШ учун бу сенсация эмас. Агар Конгресс бирон сабаб билан маълум кунгача келаси йилнинг Давлат Бюджетини тасдиқлай олмаса, ҳукумат ўз ишини тўхтатиша мажбур бўлиши ҳамма биладиган нарсадир. АҚШ-Мексика чегарасига девор қуриш лойиҳасига $5,7 млрд ажратиш масаласида Конгрессдаги Республикачилар Партияси билан Демократик Партия тарафдорлари келишолмаганлари сабабли, ўтган жума куни, яъни 21 декабрда ҳам Давлат Бюджети тасдиқланмади.

Аслида, қонун бўйича 1 октябрда бошланадиган молиявий йил учун Давлат Бюджети 1 октябргача тасдиқланиши керак эди. Аммо, Мексика билан чегарага қуриладиган девор қурилишини молиялаштириш хусусида келишолмаган 2 партия ҳукуматни 21 декабргача ҳали тасдиқланмаган Давлат Бюджети доирасида молиялаштиравериш хусусида келишиб олган экан. Мана, келишилган муддат ҳам ўтди ва бугундан бошлаб ҳукумат ишлайолмай қолади.

Эслатиш керакки, Доналд Трамп 2016 йилдаги президентлик сайоволди компанияси вақтида Мексика билан чегарага, Лотин Америка давлатларидан келаётган миллионлаб меҳнат муҳожирларининг йўлини тўсиш учун, баланд ва мустаҳкам девор қуришга ваъда берган эди. Шу ваъда доирасида бу йил чегарани қўриқлаш учун АҚШ армиясининг 10 минг кишилик қўшимча кучлари у ерга юборилди. Девор қуриш ҳам бошланди. Аммо, деворни тўла қуриб битириш учун $5,7 млрд пул керак экан. Кўринишидан, Доналд Трамп ўз сўзидан қайтмоқчи эмас, демак, ҳукумат маълум муддатга ишини тўхтатиб қўйса ҳам, икки партия ўртасида жанжал каби кураш давом этаверади.

Дарвоқе, айтиш керакки, ҳукумат ишини тўхтатса ҳам, 4 вазирилик - Ташқи Ишлар, Молия, Савдо ва Ички Хавфсизлик вазирликлари - ишларини тўхтатмасликлари учун керакли пулни олаверишлари хусусида Конгрессдаги икки партия депутатлари келишиб олган эканлар.

Яна эслатиш керакки, Доналд Трамп ўша сайловолди компанияси даврида мусулмон муҳожирларни АҚШга киритмаслик ҳақида ҳам ваъда берган эди. Демак, Мексика билан чегарадаги девор қуришни молиялаштириш муаммоси ҳал бўлса, Доналд Трамп мусулмон муҳожирлар масаласи билан жиддий шуғулланишга бошлаши муқаррар.

Расмда – Мексика билан чегарада шу кунгача бор бўлган девордан лотин-америкаликлар қандай ўтаётганини кўрмоқдасиз.
« Олдинги хабар Хабарлар рўйхати Кейинги хабар »