Ўзбекистоннинг ҳамма ахборот воситалари бир неча кун муқаддам оғир юрак хуружи билан пойтахтдаги 1-сон шаҳар клиник шифохонасининг Жонлантириш бўлимига ётқизилган Ўзбекистонда хизмат кўрсатган артист Обид Асом оламдан ўтганини хабар қилмоқдалар.

Хабарларда Обид Асом 1963 йил 22 октябрь куни Тошкент шаҳрида туғилгани, Тошкент Театр ва Рассомчилик Институтида ўқигани, 1993 йилда “Обид-А” театрини ташкил қилгани, 2006 йилдан Россия телевидениеси “Россия-1” телеканалининг “Эгри ойна” (Кривое зеркало) ҳажвий кўрсатувида қатнашиб келгани ва ўша пайтда Ўзбекистонда кўринмаганини тилга олганлар. Аммо, бирон жойда Ислом Каримнинг тожиклар режими уни феълан Ўзбекистондан ҳайдаб чиқаргани, Ислом Каримнинг ўлимидан кейин у Ўзбекистонга қайтгани айтилмаган. Лекин, 2018 йил 24 майда у Ўзбекфильм қошидаги “Мультипликацион фильмлар студияси” ДУК директори этиб тайинлангани эслатилган.

Нима бўлганда ҳам, Обид Асом Совет замонининг буюк қизиқчиси Аркадий Райкин каби халқимизнинг хотирасида абадий қолади. Марҳумнинг оила аъзолари ва яқинларига чуқур ҳамдардлигимизни изҳор этамиз. Оллоҳ уни раҳмат айласин.