Марказий Банк сўнги йиллардаги анъанасини давом эттириб, 2018 йил 27 ноябрдан бошлаб валюта операциялари бўйича бухгалтерия ҳисоби, статистик ва бошқа ҳисоботларни юритиш, шунингдек, божхона ва бошқа мажбурий тўловлари учун хорижий валюталарнинг сўмга нисбатан янги қийматларини эълон қилди. Мана баъзибир валюталарнинг сўмга нисбатан тайинланган янги ва аввалги ҳафтадаги (қавс ичида) курслари:

1 АҚШ доллари – 8299,20 сўм (8277,53 сўм)

1 ЕВРО - 9411,29 (9451,28)

1 Россия рубли - 125,39 (125,56)

1 Жанубий Корея вони - 7,33 (7,39)

1 Қувайт динори – 27312,58 (27238,57)

1 Хитой юани - 1194,52 (1193,30)

1 Туркия лираси - 1569,89 (1552,77)

Кўриб турибмизки, бу рўйхатдаги евро, рубль, Жанубий Корея вонининг сўмга нисбатан курси бироз тушган. Аммо, муҳим бўлгани, дунёда ҳукмронлик қилаётган АҚШ долларининг курси юксалгани, бир ҳафтада яна 21, 67 сўмга ортиб, 8299,20 сўмга чиқани.

Эслатиб ўтамиз, ўтган йилнинг охирида, яъни сўм девальвация қилиниб, уни эркин конвертация қилиш бошланмасдан аввал, 1 доллар 8100 сўмдан бироз юқорида эди. Кейин Ўзбекистон Марказий Банки 900 млн доллар пул ишлатиб, шу йилнинг 1 августигача долларнинг курсини 7781 сўмга туширишга эришди. Марказий Банк сўмнинг курсини ушлаб туриш учун пул ишлатолмай қолиши билан, яъни орадан сал кам 4 ой ўтиб, бугун 1 доллар 8299,20 сўмга чиқди. Яъни, шу вақт ичида сўмимизнинг долларга нисбатан курси 6,66 фоизга тушган. Бу кетишда, сўмимиз 2-3 йилда 2 баравар қадрсизланади. Бу эса, иқтисодиётимиз чўқаётганининг кўрсатгичи бўлади.

Валюта қийматини белгилаш чоғида Ўзбекистон Республикаси Марказий Банки мазкур валюталарни ушбу қийматда сотиш ёки сотиб олиш мажбуриятини олмагани ҳам алоҳида урғуланади.