26 November 2018
10:27 - Европа Иттифоқи саммитида Буюкбританиянинг бу ташкилотдан чиқиши ҳақидаги келишув тасдиқланди

Маълумки, Буюкбританияда 2016 йил 23 июнда Европа Иттифоқидан чиқиш хусусида умумхалқ рефрендум ўтказилган ва бу референдумда сайлов хаққига эга бўлганларнинг 70 фоизи қатнашиб, уларнинг 51,9 фоизи ЕИдан чиқиш учун, 48,1 фоизи чиқмаслик учун орвоз берган эди. Кўриниб турибдики, ЕИдан чиқиш учун овоз берганларни сони Буюкбританияда сайлов ҳаққига эга бўлганларнинг яримидан ҳам кам. Шу сабабли, ўтган 2 йил ичида ЕИдан чиқиш тарафдорлари билан чиқмаслик тарафдорлари ўртасида катта жанжаллар бўлди ва бу жанжаллар ҳеч қачон битмаса керак.

Аммо, кеча Брюсселда ЕИга кирувчи мамлакатларнинг раҳбарлари ва бош вазирларидан иборат Европа Кенгашининг саммит ҳам деса бўладиган йиғилишида Brexit, яъни Буюкбританинг ЕИдан чиқиши ҳақида келишув тасдиқланди. Европа Кенгашининг раиси Доналд Туск бу келишув кучга кириши учун уни ҳамма аъзолар ратификация қилиши кераклигини эслатиб, “Нима бўлса ҳам, доим дўст бўлиб қоламиз. Ратификация амалага ошмайди ва бу ҳужжат қайтадан кўриб чиқилади деб ўйламайман” дебди. Германия Канцлери Ангела Меркел ва Франция Президенти Эммануэл Макрон бу келишув тўғри бўлганини урғулашибди.

“Ҳаракат”нинг фикрича, иш бу келишув билан битмайди. Чунки, Буюкбританиядаги Brexit тарафдорлари ЕИнинг муҳожирларга керагидан ортиқча йўл бериш сиёсатидан норози эканликларини айтишган эди. Бу жуда муҳим масала ва ЕИдагилар бу масала бўйича янгича сиёсат олиб бориш кераклигини тушуниб бормоқдалар ва янгича сиёсат белгиланиши шубҳасиздир. Аммо, Буюкбританиядаги референдум натижасидан норози бўлганлар тинч қолмайдилар ва жараёнлар ички тўпалонга айланиб кетишининг эҳтимоллиги жуда катта.