Ҳайриячилик, ғарбчасига айтсак, филантроплик билан ҳам шуғулланадиган, асосан компютер технологиялари соҳасида машҳур олим ва бизнесмен, бир маҳаллар жаҳоннинг энг катта бойи, ҳозир энг катта бойларидан бири бўлган Билл Гейтс бугун Хитойдаги сафари пайтида Пекинда сув ва канализациясиз ишлайдиган футуристик туалетни тақдим қилди, дейилади Reuters Агентлиги бироз аввал тарақатган хабарда. Бу туалетда инсон чиқиндилари кимёвий моддалар ёрдамида суюқ ва қаттиқ чиқиндиларга (гўнгга) айлантирилади.

Бундай туалет Билл Гейтс ва турмуш ўртоғи Милинда Гейтс асос солган Ҳайрия Фондининг 200 миллион долларлик маблағи билан яратилганлиги, бу туалетнинг қисмлари АҚШ, Хитой ва Таиландда ишлаб чиқарилаётгани ва бундай туалетлар яқинда сотишга чиқарилиши ҳам Билл Гейтснинг сўзлари билан билдирилган.

Билл Гейтс анъанавий туалетлардан сувсиз моделга ўтишни ўтган асрнинг 70-чи йилларида ҳисоблаш машиналарининг ривожланиши, ўзи Microsoft компанияси яратиши каби жараёнлар билан солиштирибди.

Расмда замонавий туалетнинг Пекинда намойиш қилинаётган моделини кўрмоқдасиз.