21 May 2018
15:30 - Учинчи муқаддас шаҳримиз қўлдан кетмоқда: АҚШдан кейин яна 2 давлат элчихоналарини Қуддусга кўчирди

Reuters Агентлиги хабар беришича, АҚШдан кейин яна икки давлат – Гватемала ва Парагвай - ўз элчихоналарини Тел-Авивдан Қуддусга кўчирдилар. Бугун Парагвай элчихонасининг Қуддусда очилишида бу давлатнинг Президенти Горацио Картес ва Исроил Бош вазири Бинямин Натаняху иштирок этибдилар.

Ўтган йили АҚШ ўз элчихонасини Қуддусга кўчиришини эълон қилганда, аввал “Ҳаракат” агентлиги, ундан кейин Туркия Президенти Ражаб Эрдўған, бу кетишда биринчи ва иккинчи муқаддас шаҳарларимиз ҳам қўлдан кетиши мумкинлигини айтган эдилар.

АҚШ элчихонасини Қуддусда очгандан кейин, Ғазода филистинлик араблар катта норозилик намойишлари қилдилар, ҳатто Қуддусга қараб юриш қилмоқчи бўлганларида Исроил армияси билан тўқнашувларда 70 нафар араб ҳалок бўлди. Истанбулда тўпланган Ислом Ҳамкорлик Ташкилотининг саммити бу икки воқеани – АҚШ элчихонасининг Қуддусга кўчирилишини ва 70 нафар арабнинг қирғин қилинишини - кескин қораладаи. Аммо, кўринишидан жаҳоннинг энг қашшоқ ва қолоқ қисмига айланиб бўлган Ислом дунёсининг дод-фарёдига ҳеч ким эътибор ҳам бераётгани йўқ. Ваҳолангки, БМТнинг 1948 йилдаги қарорига кўра, Қуддуснинг шарқий қисми Филистин давлатининг пойтахти бўлиши керак эди, аммо 1968 йилдаги олти кунлик урушда Исроил шарқий Қуддусни ҳам босиб олган.

Ҳа, “Ҳаракат” кўп йиллардан бери айтиб келаётганидек, Ислом дини ўз ичида фундаментал ислоҳотлар ўтказмагунча ислом дунёсининг қашшоқлашиши ва қолоқлашиши давом этаверади. Ислоҳотлар натижасида Ислом дини дунёвийлик/секуляризм принципини қабул қилиши керак. Ана ўшанда Ислом дунёси бутун жаҳон билан биргаликда ривожланиб боради.