Улуғ куйчи Дадахон Ҳасан 15 мартда улуғ етмиш саккиз ёшини АҚШнинг Техас штатида кутиб олди. Ўзбекистон тўралари ғофил-булбул қолиб қақақлаган товуқларни сийламоқда. Эл оқу қорани ажратолмай қолганига кўп замон бўлди. Сохта шоиру маддоҳлар қирилиб битди. Ҳамманинг эси оғган.

Дард чўқ, ҳамдард йўқ, эл ғофил, найлайин?! дейди Улуғ Ҳазрат Мир Алишер.

Лекин Дадахон Ҳасан ёлғиз эмас, уни англайдиганлар бор. . .

Синмагин Дадахон Ҳасан, тинмагин Дадахон Ҳасан,
Кўкларни уйқудан уйғот, Ўзини уйқудан уйғот!
Куйла, ёвуз замонларга кўнмагин Дадахон Ҳасан,
Кўкларни уйқудан уйғот, Ўзини уйқудан уйғот!

Куйинг - ёвузликка қарши эзгуликнинг улуғ жангги,
Сенга овоз берди ўзи, ўзига ёқар жарангги.
Осмонларни бедор айлаб менга етсин деган Тангри
Кўкларни уйқудан уйғот, Ўзини уйқудан уйғот!

Куйла, очилсин кўр кўзлар кўрарлари - қорачуғи,
Кўзларимиз қорачуғи - Ўғизхон Қорачуғи*.
Қутлуғ ота Туронимиз - Улуғ Кўк Тангрининг туғи,
Кўкларни уйқудан уйғот, Ўзини уйқудан уйғот!

15 март, 2018 йил

*)Ўғизхон Қорачуғи - Қорачуқ - Буюк бобомиз Ўғизхон давлатининг номи