10 February 2018
14:21 - Алишер Навоийнинг туғилган куни унинг ҳайкали олдида нишонланди, бундай анъанани “Бирлик” бошлаб берган эди

Ўзбек тилини форслаштириш ва араблаштириш билан овора бўлган Ўзбекистондаги мавжуд режимнинг қўғирчоқ ахборот воситалари кеча улуғ шоиримиз Алишер Навоийнинг ТАВАЛЛУД кунига бағишланган тантаналар бўлганинини билдирмоқдалар. Қизиқ, ўзбекчада ТУҒИЛИШ КУНИ ибораси бор экан, “таваллуд” сўзини тиқиштириш кимга керак?

Навоийнинг туғилган куни унинг ҳайкали атрофида нишонланаётгани мақтовга арзийдиган воқеа. Совет замонида бу каби тадбирлар ёпиқ залларда бўларди. Ҳайкал олдида тўпланиш, гулчамбарлар қўйиш анаъанисини айнан “Бирлик” Халқ Ҳаракати бошлаб берган.

Тошкентлик бирликчилар бир неча кун аввал келишиб олдилар ва 1990 йил 9 февраль куни эрталаб 10-15 кишилик гуруҳ бўлиб Алишер Навоийнинг Навоий кўчасидаги ҳайкали одига гулчамбарлар билан келдилар. Келдилар ва ажойиб воқеа билан қаршилашдилар. Бу ерга улардан аввалроқ келган ва ичида машҳур ёзувчимиз Примқул Қодир ҳам бўлган гуруҳ Навоий ҳайкали олдига гулчамбарлар қўймоқда экан.

Бирликчилар дарҳол тушундиларки, уларнинг янгича ташаббусларидан хабардор бўлган ҳокимиятдагилар, ташаббусни ўз қўлларига олиб, “Бирлик”нинг тарихда қоладиган ташаббусини ўзлариники қилиб олмоқчи бўлганлар. Буларни жуда яхши тушунган “Бирлик” лидери Абдураҳим Пўлат Примқул Қодирга жуда нозик, аммо ўта кинояли шаклда “Ҳа, Сиз ҳам ҳокимиятнинг қўғирчоғига айланибсиз-да” маъносини билдирадиган бир жумла ҳам отиб қўйди.

Кимнинг гулдасталарини энг марказга қўйиб расмга тушиш масаласида бироз тортишув ҳам бўлди. Аммо, муҳим бўлгани, ўзбекнинг тарихида қоладиган анъана, яъни улоғ шоиримизнинг туғилган куни муносабати билан унинг ҳайкали олдида тўпланиш анъанаси ҳаётини бошлади.

Бу хабарга қўйилган расмда кеча Миллий боғда Алишер Навоийни хотирлаш учун йиғилганларни кўрмоқдасиз. “Бирлик”нинг анъанаси давоим этаётгани яхши, дейди мухбиримиз, аммо бу расмдагилар юқорининг топшириғи билан бу ерга зўрлаб олиб келинганлари ҳам шубҳасиз. Вақти келади, ўзбеклар бўлар-бўлмасга бериладиган эрталабки ошларга бориш ўрнига, улуғларимзни хотирлаш тадбирларига ўзлари югурадилар.