27 December 2017
07:50 - Владимир Путин Россия президентлигига номзод қилиб кўрсатилди, сайланиши ҳам шубҳасиз
Кеча Россиянинг таниқли сиёсатчилари, олимлари, санъатчилари, спортчилари ва бошқалардан иборат 600 кишидан ҳам кўпроқ аъзоси бўлган ташаббус гуруҳи Москвада тўпланиб, жорийдаги Президент Владимир Путинни иккинчи муддат президентликка “ўзини-ўзи кўрсатувчи” номзод қилиб кўрсатди.

Россия қонунларига кўра, номзод сиёсий партиялар тарафидан ёки ташаббус гуруҳлари номидан кўрсатилади. Ташаббус гуруҳи тарафидан номзод қилиб кўрсатилганлар “ўз-ўзини кўрсатувчи” дейилади. “Ўз-ўзини кўрсатувчилар” Марказий Сайлов Комиссиясида номзод сифатида рўйхатга олинишлари учун Рорссия Федерациясининг ҳамма субъектларидан камида 300 минг сайловчининг имзосини тўплашлари керак. Россия парламентининг қуйи палатаси бўлмиш Давлат Думасида депутатлари бўлмаган партия номзод кўрсатса, сайловчиларнинг камида 100 мингининг имзоси тўпланади. Агар номзод Давлат Думасида депутати бор партия тарафидан кўрсатилса, ҳеч қандай имзо тўпланмайди.

Демак, Владимир Путинни номзод қилиб кўрсатган гуруҳ камида 300 минг сайловчининг имзосини тўплаши керак. Ҳозир сайловчиларнинг ичида Путинни қўллаб-қувватловчилар 80 фоиздан кам эмас деб ҳисобланади. Шундай экан, 300 минг имзо тўплашда ҳеч қандай муаммо бўлмайди, бундан ҳам муҳими, у президент бўлиб бўлди, деб ҳисоблаш мумкин.

Ҳозир тахминан 40 киши президентликка номзод бўлишини эълон қилди. Ҳеч шубҳасиз, уларнинг мутлақо кўпчилиги сайловчиларнинг қонун талаб қилган сонидан имзо тўплай олмайдир, ёки бошқа сабаблар билан номзодлар рўйхатига киритилмайдилар. Тахмин қилиш мумкинки, Путиндан ташқари, Путиннинг розилигини олган тахминан 5 киши сайловларда масхарабозларча иштирок этади, аммо мутлақо кўпчилик овоз билан сал кам 20 йил ичида тўла диктаторлигини ўрнатиб бўлган Путин яна президент бўлади, У президентилик муддати пайтида бирон кутилмаган сабаб билан оламдан ўтиб қолмаса ёки дунёда мисли кўрилмаган ўзгаришлар бўлиб кетмаса, Россия қонунларини ўзгартириб умр бўйи президент бўлиш йўлларини ҳам топади.

Шу йил 7 декабрдаги “Сенсация эмас: Диктаторлар ўлмагунча ёки ағдарилмагунча тахтдан кетмаган ва кетмайдилар, Сталин ва ҳаромий ИК ҳам, В.Путин ва Ш.Мирзиё ҳам!” сарлавҳали хабаримизда айтилганидек, диктаторлар ўлмагунча ёки ағдарилмагунча тахтдан кетмаган ва кетмайдилар. Шуни билиб туриб, бугунгача ўз номзодини кўрсатиб бўлган ва кўрсатиш ҳаракатида бўлган масхарабозларнинг исмларини бу ерда ёзиб ҳам ўтирмадик.