04 November 2017
18:04 - Алишер Усмоновнинг турмуш ўртоғи Ирина хоним Путинни қўллаб-қувватлаш ниятидаги навбатдаги ҳаракатга қўшилмоқчи

Шу йил 19 октябрда росссиялик телешоу олиб борувчиси, машҳур Анатолий Собчакнинг ўзидан ҳам машҳур бўлиб кетган қизи Ксения Собчак Россия президентлигигига ўз номзодни кўрсатиш режасини очиқлагандан кейин, «Ҳаракат» шундай изоҳ берган эди: «Ғарб давлатларида, айниқса, АҚШда, таниқли санъаткорлар ва спортчилар жамоатчиликка кенг танилган шахс эканликлари ва яхши кўрилишларидан бошлари айланиб қолиб, ўзларини Яратувчидан кейин биринчи ўринда турадиган ва оддий фуқароларнинг манфаатларини ҳимоя қиладиган одам деб ҳисоблашга бошлаганлари ва айнан оддий фуқаролар уларни сал кам худога айлантириб юборишаётгани ҳозир ҳаммага маълум бўлса керак. Биз бу ерда санъаткор деганда, турли телешоуларни олиб борувчиларни ҳам назарда тутмоқдамиз. Бу шаклдаги таниқлиларни қисқача “популист” дейиш тўғри бўларди. Бундай популистлар дунёда бўлаётган воқеалар ва сиёсий шахсларга ўзлари истаган бичимда баҳо бериш, сайловларда у ёки бу номзодни очиқча қўллаб-қувватлашдан ташқари, ўзлари ҳам сайловларда иштирок эта бошладилар.»

Қаранг, популистларнинг бу каби ҳаракатлари ўзбекларни янада кўпроқ даражада қизиқтирадиган даражага келди.

Рус ахборот воситалари 2 ноябрда хабар беришга бошлаганларига кўра, АҚШда «Вашингтон Кэпиталз» номли ҳоккей тақимининг ўйинчиси, асли россиялик машҳур ҳоккеист Александр Овечкин Putin Team (Путин Командаси ёки Путин Тақими деса бўлади) номли жамоатчилик ҳаракати тузиш ниятида эканлигини эълон қилибди. Бу хабарнинг ўзбеклар учун қизиқ бўган жойи шуки, ўзбек аслли Россия миллиардери Алишер Усмоновнинг хотини, Россия Бадиий Гимнастика Федерациясининг раисаси Ирина Винер-Усмонова Александр Овечкиннинг ташаббусини қўллаб-қувватлагани ва унга қўшилишини эълон қилгани бугун хабар қилинди.

Ирина Винер-Усмонова ўз гапларига шундай қўшимча қилибди: “Биз бунга (шунақа ҳаракатга, демоқчига ўхшайди – “Ҳаракат”) аллақачон қўшилиб бўлганмиз, аммо бунинг номи йўқ эди. Биз бунга 20 йил аввал қўшилганмиз, Россия гимнини айтамиз, бунинг ярми – мамлакат ва мамлакатимизни шундай юксак даражада ушлаб турган президент шарафигадир.”

Давлат гимнини ярмини бўлса ҳам ўткинчи президент шарафига бағишлаш ҳақида гапириш хато. Аммо, бундан ҳам муҳим бўлгани, Ирина хоним Putin Team ҳаракатига қўшилиш қарорини турмуш ўроғи Алишер Усмонов билан келишиб ёки келишмасдан қабул қилганида. Алишер Усмонов 2008 йилдан бери Халқаро Қиличбозлик Федерациясининг президенти сифатида асосан чет элларда яшайди, Ирина Винер-Усмонова эса, 2008 йилдан бери Россия Бадиий Гимнастика Федерациясининг раисаси сифатида асосан Россияда яшайди. Нима, улар феълан ажрашганларми, деган савол туғилиши ҳам табиийдир.