Машҳур Вашингтон Пост газетасининг бугунги сонида А4 форматдаги қоғозда ярим саҳифача бўладиган, газетада кафтдек жой олган “Ўзбекистоннинг янги президенти либерализация томон оёқ учида кетмоқда” номли жажжи мақолача эълон қилди.

Мутлақо кўпчилиги Ўзбекистон нималигини ҳам билмайдиган ўқувчиларига мамлакатимиз ҳақида ҳеч қандай маълумот бермаган газетанинг мақолачаси қуйидагича бошланади: “Ўзбекистон ўтган йили ўлган лидери Ислом Каримов тарафидан яратилган репутацияга эга. У ерда – танқидчи мухолифатчи ва журналистлар қамалган ва қийналган. 27 йил темирқўллик билан ҳукмронлик қилган жаноб Каримов мустақил оммвавий ахборот воситаларини ва фуқаролар жамиятини супириб ташлади ҳисоб. Шу сабабли Президент Шавкат Мирзиёев йўналишни ўзгартириши мумкинлиги ҳақидаги гаплар умид берувчидир. Аҳолиси энг кўп бўлган бу Марказий Осиё давлатида инсон ҳуқуқлари ертўлададир, ягона йўл уни юқорига олиб чиқишдир."

Сўнгра, 2016 йилда ҳокимиятни қўлга олган Шавкат Мирзиёев эҳтиётлик билан бироз либераллашув йўлига ўтгани, 16 нафар сиёсий маҳбусни озод қилгани, ток-шоуларда эркинроқ гапиришга йўл бергани, мажбурий пахта териш режимини бироз юмшатгани, фуқароларни хавфсизлик хизматларининг қора рўйхатидан чиқартиргани, фуқароларнинг шикоятларини кўриб чиқиш йўлида ишлар қилинаётгани, суд органларини мутақил қилиш йўлида ҳаракатлар бошлангани, Совет замонидан қоллган чиқиш визасини 2019 йилгача йўқ қилишга ваъда бергани айтилади ва Human Rights Watch ташкилотининг «Ўзбек халқи учун инсон ҳақлари масаласида умид берувчи замон келди» деган гаплари урғуланади. Шавкат Мирзиё 13 йил Ислом Каримовнинг қўли остида Бош вазир бўлгани, у ҳозир иқтисодда ўзгаришлар қилиш учун чет эл инвестицияларига муҳтож эканлиги ҳам айтилади.

Шундан кейин айтилган гап жуда қизиқ ва мақолачанинг қолган қисмини моҳиятини ўзида акс эттиради: “Ўзбекистон ҳалигача полиция давлати сифатида бошқарилмоқда.” Ҳақиқатдан ҳам шу кичкинагина мақолачанинг қолган қисми “Ҳаракат”дан кўчириб олинганга ўхшайди. Чунки, айнан “Бирлик” Партиясининг жарчиси бўлган “Ҳаракат” Агентлиги Шавкат Мирзиё косметик ўзгаришлар қилаётгани, ҳеч қандай фундаментал ислоҳотлар ўтказиш ниятида эмаслигини гапириб келмоқда.

Шу йўлдан кетган Вашингтон Пост газетаси март ойида ҳуқуқ ҳимоячиси Елена Урлаева бир ой мажбуран психиатрик касалхонада ушлаб турилгани, МХХнинг бошида Ислом Каримов замонидан бери ўтирган одам ҳозир ҳам ўтирганини эслатади.

Мақолачанинг охирги абзацида Ўзбекистонни ҳозирги ўта оғир аҳволдан олиб чиқиш осон бўлмаслиги, бу кўп вақт олиши айтилади ва “Мирзиёев ҳақиқий ўзгаришлар қилмоқчими, ёки чет эллик инвесторларни жалб қилиш мақсадида ўйинлар қилиш билан оворами?” деган маънода савол қўйилади. Жавоб берилмаса ҳам, мақолачанинг руҳидан кўриниб турибдики, Шавкат Мирзиёев биронта жиддий иш қилишига бу газета ҳам ишонаётгани йўқ.

Ҳа, дарвоқе, газетанинг Интернетдаги сайтида шу мақолачага Шавкат Мирзиёнинг Ражаб Эрдўғон билан тушган расми ҳам қўйилган. Қоғозда чиққан газетада бу расм ҳам йўқ.