Бу мамлакатда охирги президентлик сайловлари бўлиб ўтганига 1 йил бўлмоқда. Маълумки, сиёсий элита ва ҳамма таниқли оммавий ахборот воситалари Ҳиллари Клинтонни қўллаб қуввалаганларига қарамасдан, “Бирлик” Партияси лидери Абдураҳим Пўлат биринчи бўлиб башорат қилганидек, Доналд Трамп президент бўлди. Сиёсий элита ва ахборот воситалари алам ичида ва ўзларининг сиёсий қарашлари бир тийинга қиммат эканлигини пайпаслаш ниятида, Доналд Трамп Россиянинг ёрдами билан ғалаба қозонганини иддао қилабошладилар ва мана сал кам бир йилдан бери, нафақат АШДа, балки, бутун дунёда мисли кўрилмаган ишни қилиб, сиёсий саҳнанини масхарабозлик деса ҳам бўладиган театрга айлантирдилар.

Мамлакатнинг парламенти бу масала бўйича аҳволни ўрганиш учун турли мажлислар ўтказиб ётибди, Федерал Терговлар Бошқармаси таркибида Россиянинг қўлини қидириш учун махсус комиссия туздилар. Аммо, шу кунгача аниқ фактни кўйиб туринг, ҳатто биронта “ип учи” тополмасдан жиғи-бийронлар. Улар Россия қандай шаклда сайловларга аралашган бўлиши мумкинлиги ҳақида ҳатто биронта тахмин ҳам айтолмаётганларига нима дейсиз?

Бироқ мамлакат иқтисоди барқарор юксалмоқда. Ялпи Ички Маҳсулот ҳажми ҳар доимгидек 3 фоиз атрофида ортиб бормоқда. Хўш, иқтисод аҳволини ўзида акс эттирувчи фондлар биржасида нима бўлмоқда?

Эслатиб ўтамиз, АҚШда катта бизнеснинг ва иқтисоднинг аҳволини ўзида акс эттирадиган нарса - ширкатларнинг акциялари сотиладиган Нью-Йоркдаги фондлар биржасининг асосий кўрсатгичи бўлган Dow Jones индексидир. АҚШдаги энг катта 30 ширкат акцияларининг ўртача қийматини кўрсатувчи бу индекс ўтган йилги сайловлардан олдин 18 минг атрофида ўйнаб турарди. Энди нима бўлмоқда?

Доналд Трамп президент бўлгандан бери тўхтамасдан тарихий рекордлар ураётган Dow Jones индекси шу кунларда 23 минглик маррадан ҳам ошиб ўтиб, ўткан хафтанинг охирги иш кунини 23 минг 328 билан тугатди. Демак, акцияларнинг қиймати, яъни, катта бизнесменларнинг бойлиги сал кам 4 фоизга ошди, уларнинг инвесторлик имкониятлари янада юксалди.

Демак, сиёсий алғов-далғовларга қарамасдан, Доналд Трампнинг ҳукумати ўз ишини аъло бажармоқда.

Жойи келгани учун қайтармоқчимизки, АҚШда ишлаётган ўзбеклар ҳам, бошқа мамлакатлардагилар ҳам, фондлар биржаси/бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмайдиган Dow Jones каби индекслар билан яшашни ўрганишлари, пулларини фақат банкларда эмас, ФОНДЛАР БОЗОРИНИНГ АКЦИЯЛАРИДА ҲАМ САҚЛАШНИ ЎРГАНИШЛАРИ ЛОЗИМ.

Масалан, банкда 10 минг доллар пулингиз бўлса, ўтган ойда ярим доллар атрофида фойда олгансиз. Шу пул фондлар бозорининг акцияларида сақланса, фойда камида 300-400 доллар атрофида бўларди. Фарқини кўрмоқдамисиз, жаноб америкалик ЎЗБЕКЛАР!!!!

Ўзбекистон ҳукуматидагиларга тавсияларимиз бор. Бизда ҳам тезроқ ҳақиқий фондлар бозорига ўтинг ва у ерда Dow Jones каби индекс киритинг. Ва шуни ҳам тушунингки, демократик мухолифатдан қўрқиш – катта сиёсатни тушунмаслик натижасидир. Мухолифат сиёсий барқарорсизлик чиқарса ҳам, тўғри иқтисодий сиёсатни давом эттириб, аҳоли фаровонлигининг ўсишини таъминлаш мумкин.

Расмда – фақат ўткан ҳафтанинг иш кунлари Dow Jones индексининг зиг-загли ортиб бориши.