Gazeta.ru Интернет нашри хабар қилишича, кеча Халқаро пресс-клуб йиғилишида Бош вазир ўринбосари Жамшид Қўчқор Ўзбекистон суверен кредит рейтинги олишга тайёргарликни бошлаганини билдирибди. Хабарда унинг қуйидаги сўзлари келтирилган: “Биз суверен рейтинг олиш ишларининг энг бошланғич босқичидамиз. Citibank маслаҳатчимиз бўлиши мумкин, эҳтимол банклар консорциуми бўлиши ҳам мумкин - яқин келажак буни кўрсатади.”

Маълумки, суверен рейтинг – хусусий шахс, ширкат, минтақа ёки мамлакатнинг келгусида инқирозга учраш-учрамаслиги эҳтимоллиги даражасини намоён этувчи кўрсаткич. Бугунги кунда Moody’s, Standard & Poor’s ва Fitch Ratings каби нуфузли агентликлар жаҳон давлатларининг суверен рейтингини ҳисоблаш билан шуғулланадилар. Улар рейтинг тузишда ҳукуматлар томонидан ташқи қарзларнинг ёпилиши, шунингдек иқтисодий барқарорлик даражасига катта аҳамият қаратадилар.

Масалан , халқаро рейтинг агентлиги S&P бир неча кун аввал Хитойнинг суверен кредит рейтингини АА дан А+ га туширди. Хитой бунга норозилик ҳам билдирди.

Ўзбекистон дунё мамлакатлари билан иқтисодий-молиявий ҳамкорлик қилишни истаса, бундай рейтинга эга бўлиши шарт. Акс ҳолда, бизга ҳеч қандай ишонч бўлмайди, дейди мухбиримиз. Тахмин қилиш мумкинки, Ўзбекистон ҳукуматини бундай рейтинг олишга биз билан ҳамкорлик қилётган мамлакатлар зўрлашган. Бошқа тарафдан, бундай рейтингга эга бўлиш истаги - мамлакатимизда ҳозир бўлаётган иқтисодий-молиявий соҳадаги комсетик ислоҳотларни ҳақиқий ислоҳотларга айлантириш йўлининг бошланиши бўлиши ҳам мумкин.

“Ҳаракат” айнан шундай бўлишини истайди.