17 August 2017
14:16 - Сенсация: Тошкентда автоҳалокатлар бутунлай йўқ қилинди, энди навбат ёнғинларга келди. “Ҳаракат”: Бу ишларни бошлаб кетган Коммунистик Партияни тиклаш керакмасми?
Шу йил 4 июлда “Ҳаракат” Агентлиги “Шавкат Мирзиёнинг ошкоралик сиёсати иш бошлади: Тошкентда 2 июлдаги 8 автоҳалокатда 9 киши жароҳатланиб, 2 киши оламдан ўтгани хабар қилинди” номли хабар тарқатган эди. Ўша хабарда Gazeta.uz сайти Тошкент шаҳар ИИББ ЙҲХБ йўл-патрул хизматига асосланиб, Тошкентда 2 июлдаги 8 автоҳалокатда 9 киши жароҳатланиб, 2 киши оламдан ўтгани, йўл-патрул хизмати инспекторлари томонидан 2701 та қоидабузарлик аниқланган, уларнинг 858 таси қўпол қоидабузарлик бўлса, 35 вазиятда маст ҳолатда автомобиль бошқарилганини эълон қилган эди.

“Ҳаракат” Агентлигининг бу хабарга оид таҳлили Ўзбекистоннинг тарихида қолиши аниқ. Шу сабабли уни тўла қайтарамиз:

“Автоҳалокатларга оид фоторасмларни эълон қилишга ҳали рухсат берилмаган. Энди рухсатнинг кераги ҳам йўқ. Чунки, ҳеч қандай шубҳа йўқки, 2 июлдаги автоҳалокатлар ва қоидабузарликлар ҳақида Президент Шавкат Мирзиёга маълумот берилган ва у бундай воқеаларнинг олдини олиш ва ҳалокатларга йўл берган расмийларни жазолаш ҳақида керакли топшириқлар берган. Энди Тошкентда ҳеч қандай автоҳалокатлар бўлмайди, ҳеч ким жароҳатланмайди ва оламдан ўтмайди. Келажаги буюк Ўзбекистонда бошқача бўлиши ҳам мумкин эмас.”

Ҳақиқат айнан биз айтгандек бўлди ва Шавкат Мирзиёнинг буйруғи билан бошланган автоҳалокатларни ёритиш масаласида ошкораликка ўтиш сиёсати амалий натижалар бериб бўлди. Ўша кундан бери, яъни ўтган 1,5 ой ичида, Тошкентда биронта ҳам автоҳалокат бўлмади, биронта одам ҳалок бўлмади ва яраланмади. Биронта ҳодиса юз берса, Шавкат Мирзиёнинг ошкоралик сиёсати иш бошлаган Тошкентда бу ҳақда албатта хабар берилган бўларди.

Бундай ОЛАМШУМУЛ ЮТУҚдан рағбатланган Ўзбекистон ҳукумати энди ёнғинларни бутунлай йўқ қилиш ҳаракатига тушибди ва биринчи натижалар қўлга киритилибди.

ЎзАнинг бугун тарқатилган хабарида айтилишича, ҳафтанинг ҳар чоршанбасида ўтказилаётган ёнғинлар профилактикаси куни тадбирлари корхона-ташкилот ва муассасаларда, аҳоли ўртасида ёнғин хавфсизлиги чора-тадбирларига риоя қилиш тўғрисида кенг тушунтириш ишлари олиб бориш, ёнғинларнинг олдини олиш ва бартараф этишда муҳим аҳамият касб этаётган экан.

Шавкат Мирзиё ёнғинларда ҳалок бўлаётганларнинг сонини эълон қилиш ҳақида ҳали бўйруқ бермаган бўлса керакки, Фарғона вилоятидаги аҳволга бағишланган хабарда бу ҳақда биронта рақам келтирилмаган.

Аммо, шубҳа йўқки, яқин орада Ўзбекистон ҳеч қандай ёнғин бўлмайдиган, биронта одам ҳалок бўлишини қўйиб туринг, биронта одам ҳатто жарҳатланмайдиган бўлади. Шавкат Мирзиё ҳокимиятга келгандан кейин, унинг “отаси” Ислом Карим ваъда қилган “буюк келажакга” ўта тезлик билан яқинлашиш бошланди.

СССРнинг коммунистик раҳбарлари ўтган асрнинг 60-70-чи йилларидаёқ “Тантанали шаклда эълон қиламизки, ҳозирги авлод КОММУНИЗМда яшайди” деб ваъда беришган эди. Нима, Ислом Карим ва Шавкат Мирзиё бундай ваъдалар беролмайдиларми? Бермоқдалар ва “Келажаги буюк Ўзбекистон” ҳақидаги гапирганда айнан ўша коммунизмни назарда тутаётганларига ҳеч қандай шубҳа йўқ.

Шундай экан, улуғ ишларнинг тошини қўйиб кетган Коммунистик Партияни тиклаш вақти келмадимикан?
« Олдинги хабар Хабарлар рўйхати Кейинги хабар »