13 August 2017
17:16 - Ҳақиқий хабар “Ҳаракат”да ўқилар: Англияда мусулмонларга қарши терактлар тайёрлаётган 40 киши текширув остида

Инглизларнинг The Sunday Times газетаси бугун тарқатган “Мусулмонлар нео-нацистларнинг хавфи остида” номли қисқа хабарда айтилишича, бу мамлакатда мусулмонларга қарши терактлар қилишга тайёрланаётган тахминан 40 киши устидан текширувлар олиб борилмоқда. Уларнинг кўпчилиги Йоркшир вилоятида яшайди. Айнан шу вилоятда ўтган йили оқ танлиларнинг устиворлиги тарафдори бўлган Томас Мэйр бу каби масалаларда либер-демократик позицияда бўлган Лейбористик (Меҳнат) Партиясининг парламентдаги 41 ёши Жо Кокс исмли депутат аёлини ўлдирган, кейин Томас Мэйер умрбод қамоқ жазоси олган экан.

Кўриниб турибдики, неонацистлар ўз сафдошлари Томас Мэйер умрбод қамоқ жазоси олганидан кейин қўрқувга тушмаганлар, аксинча, фаолликларини орттириш устида иш бошлаганлар ва полиция улар билан шуғулланишга бошлаган.

The Sunday Times газетасидан олинган расм неонацистларнинг 2016 йилдаги намойишларидан бирини кўрсатмоқда, у ерда бир варақлик кичкина қоғозда “Бошқа мачитлар бўлмайди” сўзлари ёзилган.

“Ҳаракат” бу хабар муносабати билан йиллардан бери айтиб келаётган фикрини қайтаради: “Ўз чўнтакларидан бошқа нарса билан ишлари бўлмаган Ислом уламолари динимизнинг келажагини ўйлашлари, жаҳонда мусулмонларга қарши ортиб бораётган кайфиятни ўзгартириш учун нималар қилиш кераклигини очиқча маслаҳатлашишга бошлашлари керак. Улар ўйлашга бошласалар, “Ҳаракат” ечим йўлини ам аллақачон кўрсатиб бўлгани, Исломда фундаментал ислоҳотлар ўтказибгина мусулмонларга қарши кайфиятни ўзгартириш, Ислом дунёсини қолоқлик ва қашшоқликдан чиқариш мумкинлигини тушунадилар.

Агар шундай қилинмаса, Ғарбда яқин замонда бошқа мачитлар очилишига рухсат берилмаслигини қўйиб туринг, борларини бекитиш ҳам бошланади. Туркиядек давлатнинг президенти Ражаб Эрдўғонга ўхшаган содда одамлар мусулмонлар Ғарбда кўпроқ бола туғса, сонимиз ортади, дунёни қўлга оламиз деб ўйлашлари ва бу йўналишда чақириқлар қилишлари эса ўта ва ўта ибтидоийлигимизнинг кўрсатгичидир, холос.