11 August 2017
22:27 - ЎзА: Шавкат Мирзиё Олмалиқ яна бир давлат корхонасига тамал тоши қўйди. “Ҳаракат”: Йирик хусусий корхоналар бўлмас экан, Ўзбекистон қашшоқликдан чиқолмайди!
ЎзА хабар беришича, бугун Ўзбекистон Президенти Шавкат Мирзиё “Олмалиқ кон-металлургия комбинати ривожланишининг иккинчи босқичи” номли лойиҳа бўйича ишларни бошлашга бағишланган тантанали маросимда иштирок этибди, яъни, тамал тош қўйди десак ҳам бўлаверади.

Хабарда айтилишича, шу йил март ойида давлат раҳбари комбинатни 2030 йилгача бўлган даврда ривожлантириш дастурини тасдиқлаган ва дастур доирасида мис ишлаб чиқаришни 1,4 баробар, қимматбаҳо металлар ишлаб чиқаришни 33 фоизга оширишни белгиланган экан.

Лойиҳани ўзлаштириш жараёнида битта темир йўлни янги жойга ўтказиш, иккита янги темир йўл қуриш, автомобиль йўллари барпо этиш кўзда тутилган. Узунлиги 1,4 километрлик туннель ва 3,1 километр конвейер йўли қурилади, ишлаб чиқариш, транспорт, энергетика ва бошқа инфраструктура объектлари барпо этилади. Янги мис-бойитиш комплекси, мисни электролиз қилиш, олтингугурт кислотаси ишлаб чиқариш цехлари ва бошқа инфратузилма объектлари қурилади.

Лойиҳа 2028 йилда тўлиқ қувват билан ишга тушади. Натижада 10 мингдан ортиқ кишининг бандлиги таъминланади. Бундан ташқари ёш мутахассислар учун 2017−2021 йилларда 400 оилага мўлжалланган тўққизта янги кўп қаватли уй, мактабгача таълим муассасаси ва 240 ўринли иккита ётоқхона барпо этилади. Ишлаб чиқарилган маҳсулотлар асосан экспортга чиқарилади.

Совет замонида ҳам сал кам ҳар куни Олмалиқдаги каби буюк лойиҳаларга тамал тошлари қўйиларди, дейди мухбиримиз. Аммо, СССРдек давлатнинг коммунистик иқтисоди ўлим йўлидан кетаверарди. Минг афсуски, Ислом Карим каби Шавкат Мирзиё ҳам майда-чуйда хусусий тадбиркорликка йўл беришдан нарига ўтмасдан, йирик хусусий тадбиркорликка мутлақо йўл бермаслик сиёсатини олиб бормоқда. Демак, сал кам коммунистик Ўзбекистон ва ўзбек халқи қашшоқликдан чиқолмайди. Ўзбекларнинг кўпчилиги йиллаб-ойлаб оилаларидан узоқда, чет элларда мардикорчилик қилишга маҳкумлар.

Расмдан ҳам кўриниб турибдики, бу заводни руслар қурадилар, асосий фойда ҳам Россияга кетади.

Бу аҳволдан чиқишни ўйлайдиган ўзбеклар борми ўзи?
« Олдинги хабар Хабарлар рўйхати Кейинги хабар »