05 August 2017
07:24 - “Бирлик” лидери Пўлатдан Президент Мирзиёга хат: Немис фашистлари ваҳшийларча ўлдирган ўзбекларнинг ҳоки Голландиядан олиб келиниши керак

“Бирлик” Халқ Ҳаракати Партияси раиси Абдураҳим Пўлат кеча Ўзбекистон Президенти Шавкат Мирзиёга электрон почта, факс ва оддий почта орқали қуйидаги мактубини юборди.

* * * * *


Август 04, 2017


Кимга: Шавкат Мирзиё, Ўзбекистон Президенти
Кимдан: Абдураҳим Пўлат, “Бирлик” Халқ Ҳаракати Партияси раиси

1942 йили Голландияда фашистлар тарафидан ваҳшийларча ўлдирилган 101 ўзбекнинг ҳоки Ўзбекистонга олиб келиб ўз тупроқларимизга берилиши, уларнинг кимлигини аниқлаш устида иш бошлаш кераклиги ҳақида

Ҳурматли жаноб Шавкат Мирзиё! Аввал Сизга йўллаган хатимда ҳам айтилганидек, исми-шарифингизни ўрислар тиқиштирган шаклда эмас, ўзимизга хос усулда ёзаётганим учун хафа бўлмаслигингизга ишонаман ва дарҳол бугунги хатимнинг мавзусига ўтаман.

Шу йил 10 майда ББС радиосининг русча хизмати “Забытые пленники: кем были узбеки, убитые нацистами в Голландии?” номли мақола эълон қилди - bbc.com/russian/features-39865409.

“Бирлик” Партиясининг жарчиси бўлган “Ҳаракат” Агентлиги бу ҳақда “Ўзбекларни бундай воқеалар қизиқтирмайди, аммо қизиқтириши керак: 1942 йили Голландияда 101 ўзбек фашистлар тарафидан ваҳшийларча ўлдирилган” номли хабар берди - harakat.net/news/?id=20628.

Хабардан маълум бўлишича, голландиялик журналист Ремко Рейдинг 18 йил аввал Россияда ишлаб Амерсфортга қайтиб келгач, бир дўстидан яқин жойда совет аскарларининг ҳарбий қабристони борлигини билибди ва у қабристонни бориб кўрибди. Бу ерда 865 совет аскари дафн этилган бўлиб, уларнинг ичида 101 ўзбек бор экан. Смоленскда урушнинг биринчи ҳафталарида асирга олинган ўзбекларни пропаганда мақсадлари билан Голландияга олиб келишган ва Совет армияси кимлардан иборат эканлигини кўрсатиш учун лата-путталарга ўралган тор кўзли ўзбекларни шаҳар кўчаларидан ҳам юргизишган экан. Уларни бир қисми очлик ва оғир ишлар туфайли ўлган, қолганларини отиб ташлашган.

Шу пайтгача 101 ўзбекдан икки нафарининг исми аниқланибди - Кадиров Хатам ва Муратов Заир.

Ўзбек халқи ва унинг номини олган Ўзбекистон давлатининг расмийлари бундай хабарга бефарқ қолмасликлари кераклиги шубҳасиздир. Аммо, ҳозирча на ўзбеклар, на давлат расмийлари бу воқеа билан яқиндан қизиқаётганлари кўринмаяпти.

Шу сабабли, Сиздан илтимос қиламан, бу масала билан шуғулланадиган махсус комиссия туздиринг. Бу комиссия 101 нафар миллатдошимизнинг ҳокини Голландиядан олиб келиб, Ўзбекистонда тупроққа берилиши ва уларнинг исми-шарифларини аниқлаш устида ишлаши керак. Бу иш иложи борича тезроқ қилиниши лозим. Акс ҳолда, “ўзбеклар миллат сифатини йўқотиб бўлганлари” ҳақидаги иддаолар тўғри эканга ўхшаб қолади.

Ҳеч шубҳа йўқки, “Бирлик” ва “Ҳаракат”нинг саъй-ҳаракатлари билан ЎЗБЕК миллат сифатини тиклайди, 75 йил аввал Голландияда немис фашистлари ваҳшийларча ўлдирган 101 нафар, 7 йил аввал Қирғизистонда қирғиз фашистлари ваҳшийларча ўлдирган 300 нафар миллатдошимизнинг тақдири ва бошқа шу каби миллатнинг бугунги аҳволини ўзида акс эттирувчи воқеаларга жиддий эътибор бермаётган ЎЗБЕК давлати раҳбарларига ўз баҳосини беради.

Ҳурматлар билан,
Абдураҳим Пўлат