Бугун журналист Бобур Алихон Ўзбекистон Миллий Телерадиокомпанияси (МТРК) раиси этиб тайинланди. У шу пайтга қадар ярим йил раислик қилган Хуршид Мирзоҳиднинг биринчи ўринбосари бўлиб ишларди. Хуршид Мирзоҳид ишидан улоқтирилганини бугун бошқа бир хабаримизда тилга олган эдик.

Маҳаллий сайтларнинг иддаосича, Хуршид Мирзоҳиднинг ишдан ҳайдалишига “Таҳлилнома” кўрсатувининг якшанба кунги сонида президенгт Шавкат Мирзиёнинг сиёсати бесўнақайларча улуғланиши, айни замонда, марҳум Ислом Каримнинг қўшни давлатлар билан яқин ўтмишдаги ташқи сиёсати кескин танқид қилингани сабаб бўлган. Хусусан, Президентининг Давлат маслаҳатчиси Хайриддин Султонга тегишли экани айтиладиган қўғирчоқ Кун.Уз сайти мазкур тахминни илгари сурганди.

Аммо президент маҳкамасига яқин манбаларнинг “Ҳаракат”га билдиришича, бу телерадиокомпания раисининг ишдан олиниши ҳақидаги Кун.Уз сайтининг иддаоси тўғри эмас. Асл сабаб - Ўзбекистон каналида академик Саидасрор Ғулом ҳақида кўрсатув берилгани ва, манбанинг айтишича, акаси Саидҳарор Ғулом бўлган бу тошкентлик олимлар хонадони Шавкат Мирзиёнинг узоқ йиллик душмани эканлигидир.

Агар бу иддао тўғри чиқса, яъни МТРК раиси шу сабабдан ишдан улоқтирилгани аниқланса, бу – Шавкат Мирзиёнинг сиёсий ўлими бўлади.

Яна ўша манбанинг билдиришича, Кун.Уз сайтини қўғирчоқликда айблаб келаётган “Ҳаракат” сайтининг раҳбари Абдураҳим Пўлатга бу сайт очилмайдиган қилиб қўйилибди. Абдураҳим Пўлатнинг айтишича, у Кун.Уз сайтига ҳар замонда бир марта у ҳали ҳам қўғирчоқ эканлигини кўриб қўйиш учунгина кириб турар экан. Унга шу кунларда Интернет браузерлардан биридан Кун.Уз сайти талаб қилгани учун унга блок қўйилгани ҳақида бир жумлалик билдириш келибди. Роса кулдим, дейди Абдураҳим Пўлат. Хоҳласам, бу ҳаромий сайтни уйимдаги бошқа компютердан ёки ўз компютеримдаги бошқа браузер орқали очоламанку.