1987 йилдан бери жаҳон миллардерларининг рўйхатини тузиш билан шуғулланадиган АҚШдаги молиявий-иқтисодий Forbes журнали 27 июлдаги хабарида билдиришича, жаҳоннинг бойлари рўйхатида биринчи ўринга америкалик миллардер Жеф Безос чиқибди (расмда).

У 1995 йилда Интернет орқали китоб сотадиган Аmazon ширкатини яратган, кейинчалик бу ширкат турли товар ва хизматлар сотадиган энг катта онлайн-ритейларга айланган эди. Ҳозир Жеф Безос бу ширкат акцияларининг 17 фоизига эгалик қилар экан.

Акцияларининг нархи 27 июлда 1,6 фоизга ошгач, Жеф Безоснинг бойлиги $90,5 миллиардга чиқибди. Бу Билл Гейтснинг бойлигидан 500 миллион доллар кўпроқ.

Эслатиб ўтиш керакки, 2016 йилнинг август ойи охирида дунёнинг 88 мамлакатида 6750 магазинни ўз ичига олувчи Inditex холдингининг раҳбари Амансио Ортега Билл Гейтсни иккинчи ўринга тушириб, биринчи ўринга чиққан, аммо шу йил март ойида Билл Гейтс биринчи ўринни қайтариб олган эди. Қизиқ, энди у яна биринчи ўринни қайтариб олгунча қанча вақт ўтаркин?

Яна ҳам қизиғи, аҳолиси 30 миллиондан ошган бечора Ўзбекистонимизда миллиардерни қўйиб туринг, битта ҳам расмий миллионер йўқлиги. Шундай давом этаверса, Ўзбекистон қолоқлик ва қашшоқликдан чиқолмайди. Қаердасиз, жаноб Шавкат Мирзиё?