Бугун АҚШ Президенти Доналд Трамп бир неча кун аввал Конгрессининг иккала палатаси тарафидан маъқулланган Россия, Эрон ва Шимолий Кореяга қарши янги санкциялар киритувчи қонунни имзолаб, уни ҳаётга жорий қилишни бошлади.

Reuters Агентлиги бу қонун лойиҳаси 28 июлда Сенат тарафидан маъқуллангани билдирувчи хабарига “Сенат Трампни бурчакка тиқиб, Россияга санкциялар билан шапалоқ урди” деб сарлавҳа қўйган эди. Унинг бугунги хабарига эса, “Трамп Россияга қарши санкциялар қонунини имзолади, аммо уни “нуқсонли” деди” сарлавҳаси қўйилган. Яъни, АҚШнинг ҳамма ахборот воситалари каби, Reuters Агентлиги ҳам ҳар бир имкониятдан фойдаланиб, Трампга пичингли тош отиб қўйишдан ҳали ҳам тўхтагани йўқ.

Хабарда айтилишича, Трамп бу қонунни измолагандан кейин, ўз ҳукумати аъзоларига Конгресс президентнинг ташқи сиёсатни белгилаш ваколатларини бузаётганини, ўзи бундан кейин Конгрессдан кўра кўпроқ ҳукумат билан келишувлар қилишини айтибди.

Бу хабарга дарҳол ўз муносабатини билдирган Россия Бош вазири Дмитрий Медведев Россияга қарши санкциялар ўн йиллаб давом этиши кўринаётгани, АҚШ Россияга қарши савдо уруши ҳам очганини гапириб, бундан буён Россия-АҚШ муносабатлари Конгресснинг таркиби ва президентнинг шахсидан қатъий назар жуда танг бўлади, дебди. Бечора Путин ҳали бу хабарга муносабат билдиролмайдиган кайфиятда бўлса керак.

Бу икки буюк давлатнинг мунсабатлари ёмонлашиб бораверишини қўйиб туринг, дейди мухбиримиз, санкциялар Россияга янги техник жиҳозлар, янги технологиялар бермаслик йўлидан кетаверса, бечора Россия бир маҳаллар СССРда бўлгани каби жуда оғир аҳволга тушади ва охир-оқибатда парчаланиб кетади.

Қолаверса, “бечора” иборасини фақат Россияга эмас, Путин билан дўстона алоқа қилаётган ҳамма давлатларнинг раҳабарларига нисбатан ишлатиш мумкин бўлаверади. Булар ичидаги бизни қизиқтирадиган баъзи шахсларни эслатиб ўтишдан фойда бор: Ражаб Эрдўғон, Нурсултон Назарбой, Шавкат Мирзиё, Алмазбек Атамбаев. У ҳолда “бечора Турк Дунёси” дейиш керакмасми?