10 July 2017
18:36 - Бирликчиларнинг 1989 йил Тошкентдаги ва отатуркчиларнинг кеча Истанбулдаги митинглари ҳамда Ислом Карим ва Ражаб Эрдўғон режимларининг ўхшашликлари
Отатуркчиларнинг Жумҳурият Халқ Партияси Президент Ражаб Эрдўғон режимининг адолатсизликларига қарши Анқарадан Истанбулгача Адолат Юриши номли намойишлар ўтказгани ва кеча Адолат Юриши Истанбулдаги Молтепа майдонида Адолат Митинги билан тугалланганини аввалги хабаримизда билдирган эдик.

Бугун Туркия ахборот воситаларида айтилишича, бу митинг ташкилотчилари Молтепа майдонига 1 миллион 600 минг киши келганини айтмоқдалар. Аммо, Истанбул шаҳар волийси (давлат тарафидан тайинланадиган губернатори) митингда 170 минг киши қатнашганини эълон қилибди. Исломчилар дарҳол бу рақамлар атрофида маш-машалар бошладилар ва “қаранг, ўтган йили Эрдўғон раҳбарлигида ўтказган митингимизда 2 млн одам қатнашганди, буларнинг митингига бор-йўғи 160 минг киши келибди” дейишгача бормоқдалар.

Бу воқеа, дейди “Бирлик” Партияси раиси Абдураҳим Пўлат, бизнинг 1989 йили ўзбек тили давлат тили бўлсин талаби билан ўтказган митингларимизни эслатди. 1989 йили 15 октябрь куни ўтказган митингимизни жуда яхши эслайман. Ўша пайтда халқ Қизил майдон ҳам дейдиган, аммо расмий номи Ленин майдони бўлган жойда муҳташам митинг ўтказдик. Эртасига эрталаб мени қандайдир баҳоналар билан Коммунистик Партиянинг Куйбишев район (ҳозирги Мирзо Улуғбек тумани) ташкилотининг ўша пайтдаги Пушкин майдонида жойлашган биносига олиб келишди. Ўша ерда билдимки, мени бу партиядан ўчириш учун партиянинг Район Комитети Бюросининг мажлисига олиб келишан экан.

Коммунистик Партиянинг яқинда ўлишига ишонган камдан-кам одамлардан бири сифатида ҳеч қўрқмасдан бу мажлисни масахарабозликка айлантириб юбордим. Ўлаётган ташкилотдан мени чиқариш билан оворамизлар деб уларнинг устидан кулдим, айни пайтда, ўзимизнинг агитациямизни шу ерда ҳам давом эттириб, “Мана кўринг, 20 минг киши митингга келиб, Ўзбек тили давлат тили бўлишини талаб қилмоқда. Биз барибир бунга эришамиз, аммо бугунги қарорларингиз билан ўзларингни шарманда қиласизлар” дейишгача бордим. Ваҳолангки, билмаганлар учун эслатаман, ўша пайтда бирон кишини партиядан чиқариб ташлаш, ўлим жазосидан кейинги энг даҳшатли жазо ҳисобланарди. Шу пайтгача яхши ишларда ишлаб келаётганлар бундан кейин карьералари битишини тушунганлари сабабли, кўпинча инфаркт ёки инсультга учрардилар.

Ўша йиғилишда райком раҳбарларида бири дарҳол менга жавоб берди: “Биз милициядан маълумот олдик, митингларингда бор-йўғи 2-3 минг атрофида одам қатнашган”. Шубҳасиз, тушунардимки, митингни камситиш, қатнашувчилар сони камайтириб кўрсатиш ҳақида Ислом Каримнинг ўзидан топшириқ келган. Хўп, дедим мен, сиз айтадётгандек бўлсин, ммитингга 2-3 минг киши келган бўлсин, у ҳолда нимадан бундай қўқувга тушиб, мени партиядан ўчирмоқсизлар? Чунки, кўрмоқдасизки, халқ бизни қўллаб-қувватламоқда, шундан қўрқаяпсиз, оддий халқни қўрқитиш учун ҳеч нарсадан қўрқмайдиган мени партиядан ўчирмоқчисиз.

Хуллас, мени партиядан ўчирдилар, аммо халқни энди тўхтатиб бўлмаслигини тушунган Ислом Карим ўзбек тилига давлат тили мақоми бериш қонунини чиқаришга мажбур бўлди. Митинг қатнашчилари сони ҳақидаги фикрим эса шундай. Аслида, ҳақиқат ўртада бўлган бўлиши мумкин. Яъни, митинг қатнашчилари биз ўйлаётгандек 20 минг эмас, ҳокимиятдагилар айтаётгандек 2-3 минг ҳам эмас, тахминан 10 минг киши бўлиши мумкин. Аммо, 10 минг кишилик матинг ҳам Ўзбекистон учун даҳшатли воқеа эди.

Ўйлайманки, Туркияда ҳам айнан ўша ўйинлар бўлмоқда. Отатуркчилар уюштирган Адолат Юриши ва Адолат Митингининг обрўсини тушириш мақсадида Эрдўғоннинг топшириғи билан митинг қатнашчиларининг сонини камайтириб кўрсатишга ҳаракат қилинмоқда. Агарда митинг ташкилотчилари ва волий айтаётган рақамларнинг ўртасида тўхтатасак ҳам, митингда 800-900 минг атрофида одам қатнашганини тахмин қилиш мумкин. Бу ҳам даҳшатли рақам.

Аммо, Эрдўғоннинг ўзи ҳам кўрдики, 1 миллионга яқин киши очиқча унинг диктаторлигига қарши чиқди, адолат истаи. Халқ отатуркчиларнинг кучини кўрди, энди Эрдўғоннинг диктаторлик табиатидан қўрқиб, турли ҳаракатлардан четроқда туришга интилаётганлар ҳам отатуркчиларнинг митинг ва намойишларига чиқишга бошлайдилар.

Жумҳурият Халқ Партиясининг раиси Кемал Қиличдорўғлининг Адолат Юриши ҳақида “Бу ҳали бошланиши” деган сўзлари тўппа-тўғридир.

Ўзбек демократлари, қолаверса, Турк Дунёси демократлари, яна қолаверса бутун Ғарб отатуркчиларни қўллаб-қувватлашлари керак.

Расмда – “Бирлик”нинг 1989 йилги намойишларидан бири. Навоий кўчасида. “Бирлик”нинг ҳамма митинг ва намойишлари видеоларга олинган. Ахир бир кун вақти келади бу видеоллар телеканаллар оқали намойиш қилинади. Ўша пайтгача, “Бирлик”га қарши бўлган ўзбек халқининг душманлари Ўзбекистондан қочиб қолишлари керак. Чунки, халқ учун кўчага чиққанлар қандай таъқиб қилингани кўрган халқ ўз душманлардан ўч олишга бошлаши табиийдир.