07 July 2017
16:00 - Гамбургда G20 ташкилотининг саммити ё бошланди, ё бошланмоқчи

Гамбург шаҳрида жаҳоннинг иқтисодий жиҳатдан энг кучли 19 давлати ва Европа Иттифоқини бирлаштирувчи G20 ташкилотининг саммити расман очилгани ҳозиргина тарқатилган хабарларда айтилмоқда. Хабарлар устидан кулиш ҳам мумкин, чунки, саммит расман очилгани айтилмоқда, қатнашчиларнинг биргаликда тушган расмлари шу дақиқаларда эълон қилинди, аммо саммит амалий иш бошлаб бошламаганини тушуниш қийин. Ҳозир Тошкента соат 16:00, Гамбургда 13:00.

Ростдан ҳам масхарабозлик руҳидаги хабарларда ҳар бир G20 аъзосини йиғилиш бўладиган залга кираверишда Германия Канцлери Ангела Маркел қандай кутиб олаётгани, ким биландир қўл бериб кўришар экан илжайгани, бошқаси билан самиий кулишгани ва шу каби тафсилотларга эътибор берилади. Ҳамманинг эс-ҳуши бугун куннинг иккинчи ярмида бўладиган АҚШ ва Россия президентлари Трамп ва Путиннинг учрашувида.

Эслатиб ўтамиз, G20нинг аъзолари қуйидагилардир - Австралия, Аргентина, Бразилия, Буюкбритания, Германия, Ҳиндистон, Индонезия, Италия, Канада, Хитой, Мексика, Россия, Саудия Арабистони, АҚШ, Туркия, Франция, Жанубий Корея, Жанубий Африка Республикаси, Япония ва Европа Иттифоқи.

Қатнашчилар расмга тушмасидан ҳам олдинроқ БРИКС деб аталадиган 5 давлат - Бразилия, Россия, Ҳиндистон, Хитой ва Жанубий Африка Республикаси - лидерлари қисқа учрашиб олишгани ҳам айтилмоқда.

Гамбургда қандайдир анархист гуруҳлар G20 саммитига қарши турли акциялар ўтказишаётгани, улар полиция билан тўқнашишлардан ҳам чекнишмаётгани, ўнлаб полиция хизматчилари ҳатто жароҳатлангани хабар қилинмоқда.

Тахмин қилиш қийин эмаски, G20 саммити ҳам масхарабозлик руҳида ўтади, ҳамманинг диққат марказида саммит йиғилиши эмас, саммит қатнашчиларининг икки тарафлама учрашувлари бўлади.

Cаммит қатнашчилари тушган расмда 30-35 киши бор. Қолган 10-15 киши кимлар эканлиги хабарларда айтилмайди ҳам. Расмни яхшироқ кўриш учун уни курсор билан босинг.