30 June 2017
01:18 - Ниҳоят АҚШ ва Россия президентлари яқинда Гамбургда бўладиган G20 саммитида учрашишлари эълон қилинди
Reuters Аентлиги ҳозиргина (АҚШда маҳаллий вақт билан соат 15:44) тарқатган хабарида айтилишича, Оқ Уйнинг Миллий Хавфсизлик Маслаҳатчиси Макмастер журналистларга Доналд Трамп ва Владимир Путин келаси ҳафтанинг сўнгида, аниқроғи, 7-8 июль кунлари Гамбург шаҳрида ўтказиладиган жаҳоннинг иқтисодий жиҳатдан энг кучли 20 давлатининг G20 деб айтиладиган ташкилотининг саммити доирасида учрашишади. Ҳали учрашувнинг кун тартиби белгиланмаган.

Мана, Доналд Трамп президентлик курсисига ўтирганига 5 ойдан кўп вақт бўлди, у дунёниннг сал кам ҳамма лидерлари билан кўришиб бўлди. Вашингтоннинг ўзида бўлган учрашувлардан ташқари, у Саудия Арабистонига борганида сал кам ҳамма Ислом давлатларининг лидерлари билан, орада Исроил, Филистон лидерлари ва Рим Папаси билан учрашувлардан кейин, Брюсселда ЕИ, кейин Италида НАТО лидерлари билан кўришиб бўлди.

Бир неча кун аввал эса, яна Вашингтонда Ҳиндистон Бош вазирини ҳам қабул қилди. Аммо, сайлов кампанияси даврида Россия ва унинг президенти билан бузилган алоқаларни тиклашга ваъда берган Трамп ҳалигача Путин билан учрашмаганини қўйиб туринг, АҚШнинг Россия билан алоқалари яна ҳам ёмонлашди. Россия Украина ҳудудларини босиб олганидан кейин АҚШ тарафидан киритилган санкцияларни яқиндагина яна давом эттириш қарори олинди.

Аслида, бунинг ҳайрон қоладиган жойи йўқ. “Ҳаракат” Агентлиги АҚШдаги сайлов олди кампанияси даврида Доналд Трамп президентлик пойгасида ғалаба қозонишини ҳаммадан аввал башорат қилар экан, АҚШдек демократик давлатда президент ҳам истаган нарсасини қиолмаслиги, у давлатда парламент ва мухолифатнинг катта кучи борлигини, жорийдаги президент улар билан ҳисоблашишга мажбур эканлигини, аслида, демократияларда айнан шундай бўлиши кераклигини ёзган эди.

Тахмин қилиш мумкинки, Доналд Трамп парламент ва мухолифат лидерларидан Путин билан учрашувга рухсат олган. Уларнинг бунга рози бўлишлари ҳам тушунарлидир. Оқ Уйнинг Миллий Хавфсизлик бўйича маслаҳатчиси Макмастер журналистларга айтганидек, Россия АҚШдаги сайловларга қандайдир таъсир кўрсатгани, Путин ва Трампнинг одамлари ўша пайтда бу масала бўйича ҳамкорлик қилганларини тасдиқловчи биронта факт ўртага чиқмади. Бу тўғри ва Ҳаракат” аввалдан шундай бўлишини айтиб келарди, аммо икки буюк давлатнинг раҳбари G20 саммитида биргаликда иштирок этишса ва учрашишмаса, мантиқсизлик бўлиши ҳам тушунарлидир. АҚГ Конгресси ва мухолифат лидерлари шуни ҳисобга олганлари ҳам шубҳасиздир.

Яна тахмин қилиш мумкинки, бу учрашув рамзий бўлади, стратегик муаммолар, масалан, Суриядаги АҚШ-Россия қарама-қаршилиги шунчаки тилга олинади.

Расм ҳам Reuters Агентлигининг сайтидан олинган. У ерда Путин биринчи ўринга қўйилганига эътибор беринг.
« Олдинги хабар Хабарлар рўйхати Кейинги хабар »