Аввалги хабарларимиздан маълумки, шу йил 27 январда АҚШ Президенти Доналд Трамп 7 мамлакат (Сурия, Эрон, Ироқ, Ливия, Сомалия, Судан ва Яман) фуқароларига АҚШга киришни 90 кунга ва ҳар қандай қочқинларга 120 кунга тўхтатган эди. Бу қарор Грин Қартаси ёки АҚШга кириш визаси олиб бўлганларга ҳам тегишли эканлиги ҳам эълон қилинди.

Аммо, Нью-Йорк Федерал Суди феълан Президентга қарши чиқиб, кириш визаси олиб бўлганларга АҚШга кириш ҳаққи берди. Вашингтон штатининг Федерал Суди эса, штат прокурорининг Трамп чиқарган қарорни бутунлай бекор қилиш талаби бўича ниҳоий ҳукм чиқарилгунча, қарорни вақтинча тўхтатиш ҳукми чиқарди. Штатлардаги Федерал Судларнинг ҳукми бутун АҚШда ишлар экан. Шу сабабли, АҚШга келаётган мусулмон муҳожирларнинг АҚШ кириши йўлида Трампнинг қарори билан киритилган қийинчликлар иш бошламасданоқ тўхтатилди. Бу нарса Президентнинг мағлубияти сифатида қабул қилинди.

“Ҳаракат” Агентлиги Доналд Трампнинг ҳукумати ўз қарорини кучга киритиш учун курашини давом эттириши шак-шубҳасиз эканлигини таъкидлар экан, бу курашда охир-оқибатда Трамп ғалаба қозонишини башорат қилган эди.

Мана орадан ярим йил ҳам ўтмасдан, одатдагидек, башоратимиз тўғри чиқди. 26 июнда АҚШнинг Олий Суди Трампнинг ўша қарорини кўриб чиқди ва бу қарор баъзи чекловлар билан ишлашга бошлаши кераклиги ҳақида ҳукм чиқарди.

Олий Суднинг бу ҳукми ҳақидаги хабарлардан Трампнинг қарорига қандай чекловлар қўйилганини тушуниш қийин, аммо бу бизнинг ўқувчилар учун унча муҳим бўлмаса керак. Кеча АҚШ ҳукумати ўша 7 давлатнинг 6 тасидаги элчиликларига АҚШга келишга рухсат бериш учун киритган қийинчликларни ишлатишга бошлаш ҳақида топшириқ бергани ҳам хабар қилинди.

Доналд Трамп Олий Суднинг бу ҳукмни ўзининг ғалабаси деб эълон қилди. "Ҳаракат" ҳам шундай қилишга ҳақли.