Аввал ўзини ИШИД (Ироқ ва Шом Исломий Давлати) деб атаган, кейин Исломий Давлат номини олган замонавий Халифаликнинг Халифаси Абу Бакр ал-Боғдодий ўлдирилган ҳақида бир неча марта хабарлар тарқатилди, аммо улар кейинчлик тасдиқланмади. Шу сабабли, шу йил 10 июнда Сирия ҳукумати расмийларига асосланиб, Абу Бакр ал-Боғдодий ўлдирилгани ҳақида тарқатилган хабарни “Ҳаракат” жиддийга олмади. Бугун Россия Мудофаа Вазирлигининг матбуот хизматига асосланиб тарқатилган хабарларда айтилишича, Мудофаа вазирлиги Абу Бакр ал-Боғдодийнинг ўлгани ҳақидаги маълумотларни ҳалигача текширмоқда экан.

Абу Бакр ал-Боғдодий ИШИДнинг Ироқдаги пойтахти деса бўладиган Мосул шаҳрида эканлиги айтиларди. Ҳозир Ироқнинг ҳарбий кучлари Мосулни ИШИД жангариларидан сал кам бутунлай тозалаб бўлдилар. Шундан бери Халифа Сирияда бекиниб юргани айтилар эди. Руслар уни айнан Сирияда (аниқ жойи айтилмаяпти) қандайдир мажлис ўтказаётган пайтда Су-35 и Су-34 ҳарбий учоқлари билан бомбалаб ўлдирганлари иддао қилинмоқда. Мажлис қатнашчилари ҳам бутунлай ёки қисман ўлдирилгани айтилмоқда.

Шу кунларда ИШИД тузилгани ҳақида ИШИДчиларнинг ўзи тарафидан расман хабар берилганига 3 йил бўлмоқда. Россия Эрон ва Сирия кучлари билан, АҚШ Ғарб коалицияси билан ҳалигача Халифаликни йўқ қилолмаяптилар. Халифаликнинг қуролли кучлари таркибида қанча жангари борлиги ҳақида аниқ маълумот ҳам йўқ, аммо турли гаплар кўп.

Лекин, бир нарса аниқ, “Бирлик” Партияси лидери Абдураҳим Пўлат 2015 йилнинг бошида АҚШнинг ўша пайтдаги Президенти Барак Обамага йўллаган хатида башорат қилганидек, бу Халифалик йўқ қилинади, аммо ислом терроризмининг илдизлари Қуроъннинг хато тафсиридан келиб чиқувчи хато тушунчаларда эканлиги сабабли, бошқа исломий террористик ташкилотлар ўртага чиқаверади. Ислом терроризмини йўқ қилишнинг ягона йўли - Ислом динида фундаментал ислоҳотлар ўтказиш, Ислом динини хато тушунчалардан тозалаш, биринчи навбатда, Ислом дини дунёвийлик/секуляризм принципини тан олишига эришишдир.

Бироқ, Ислом дини фундаментал ислоҳотларга тайёр эмас, демак, ислом терроризми дунё бўйлаб давом этаверади.