12 June 2017
20:49 - Россия масхарабозликлар ичида: Қандайдир “Россия Куни” нишонланмоқда, Алексей Навальний намойиш ўтказолмай хуноб. “Ҳаракат”: РФ парчаланиш йўлидами?
Маълумки, 1990 йил 12 июнда СССР таркибидаги Россия (расмий номининг қисқартмаси - РСФСР) давлат суверенитети ҳақида декларация, очиғини айтса, СССР ичида алоҳида ва мустақил давлат эканлигини тасдиқловчи ҳужжат қабул қилди. Ваҳолангки, аслида, бутун СССР - Россия Империяси эди. 1991 йили СССР парчаланиб кетмаса эди, бу декларация қоғозда қолиб кетаверарди.

Аммо, ҳамма республикалардаги халқ ҳаракатлари ва халқ фронтларининг кураши натижасида СССР парчаланиб кетди, Россия ҳам Россия Федерацияси номи остида мустақил давлат бўлиб қолди. Шундан бери 12 июнь “Россия Куни” сифатида байрам қилинишга бошланди. Расмиятчилик нуқтаи назаридан, бу - Россиянинг энг катта байрамидир. Яъни, шунчаки қоғозда қолиб кетадиган, ҳеч қандай сиёсий аҳамияти бўлмаган ҳужжат қабул қилинган куни байрам қилиниши масхарабозлик эмасми?

Аммо, бироз ўйлаб кўрилса, тушуниш мумкинки, Ўзбекистон ҳам ҳеч қандай аҳамияти бўлмаган Мустақиллик Декларациясини 1991 йил 31 август куни қабул қилди. Ваҳолангки, расман 1925 йил 2 май куни қабул қилинган Ўзбекистон Совет Социалистик Республикасининг Конституциясига кўра, Ўзбекистон мустақил давлат эди, мустақил давлат сифатида Советлар Иттифоқига кирган эди. Ўзбекистон ССРнинг 1977 йилда янгидан қабул қилинган Конституциясида ҳам шундай дейилган. Яъни, ўзбеклар ҳам, худди руслар каби, қозоздагина бор бўлган ҳужжат асосида Мустақиллик Кунини байрам қиладилар. Бундай масхарбозлик Украина, Гуржистон, Озорбайжон, Эстония, Литва ва Латвиядан бошқа ҳамма собиқ совет республикаларида давом этмоқда.

Хуллас, бугун Россия “Россия Куни”ни байрам қилиш қилиш билан овора. Бу мамлакатнинг оммавий ахборот воситалари фақатгина Москвада ўтказилган байрам тадбирларидан 2,5 млн (!!!!) киши қатнашганини айтмоқдалар. Яъни, СССРдан қолган сохта анъаналар давом этмоқда.

Россияда коррупцияга қарши курашиб ном чиқарган Алексей Навальнийнинг “Коррупцияга Қарши Кураш Фонди” айнан бугун Москва ва бошқа кўплаб шаҳарларда Россияда авжига чиққан коррупцияга қарши норозилик намойишлари ўтказиш учун рухсат сўраб, маҳаллий ҳокимиятларга ариза берган эди. Москвада ҳокимиятидан шаҳар марказидаги Тверь кўчасида намойиш ўтказишга рухсат сўралди, аммо ҳокимият бироз четроқдаги Сахаров Проспектига рухсат берди. Бироқ, куни кеча Алексей Навальний Интернет орқали Москвадаги намойиш, рухсат берилмаган бўлса ҳам, Тверь кўчасида бўлиши ҳақида эълон берди.

Ҳокимият полицигя буйруқ берди ва полиция одамларнинг Тверь кўчасига боришларига йўл қўймади. Навальнийнинг ўзи уйидан чиқаверишдаёқ қўлга олинди, кейин Тверь кўчаси ва атрофида юзга яқин киши қўлга олингани хабар қилинди. Санкт-Петербургда 500 киши қўлга олинибди. Бошқа шаҳарларда кўпи билан бир неча юз кишилик рухсатли намойишлар бўлиб ўтган.

Аслини олганда, дейди мухбиримиз, Алексей Навальнийнинг бу қилган иши ҳам масхарабозликдан бошқа нарса эмас. У ақлли сиёсатчи бўлса эди, ҳамма рус демократлари билан биргаликда Россияни демократлаштириш, Путинни истеъфога жўнатиш каби талаблар билан митинглар ўтказиши керак эди. Чунки, демократининг ривожланишигина коррупция ва порахўрликни камайтиришга йўл очади.

Бугун Россияда тилга олса аризийдиган биронта катта намойиш ўтказилмагани Алексей Навальний сиёсий ўлим йўлига кетишга бошлаганининг кўрсатгичи бўлиши мумкин.

Қолаверса,ҳокимиянинг ва мухолифатчиликка иддао қилаётганларнинг бундай масхарабозликлари Россия Федерациянинг ўзига катта зарба бўлиши ва бу Федерация ҳам парчаланиб кетиши муқарралиги ҳақидаги башоратларимизни тасдиқлашга хизмат қилиши мумкин.

Расмда – Қозонда Навальний тарафдорларининг рухсатли митинги.
« Олдинги хабар Хабарлар рўйхати Кейинги хабар »